Vrasja në Pejë, policia kontrolle në banesën e autorit të dyshuar! Gjenden armë, thika dhe gëzhoja

Policia e Kosovës ka kryer kontrolle në banesën e autorit të dyshuar të vrasjes së Arlinda Zekajt, ngjarje e cila tronditi Pejën dhe të gjithë vendin.

Sipas Policisë, gjatë kontrollit në shtëpinë e të dyshuarit janë gjetur një pushkë gjuetie, 153 fishekë, disa karikatorë, disa pajisje të armës, tre thika, 115 gëzhoja dhe një sëpatë.

“Lidhur me rastin, gjatë kontrollit të shtëpisë së të dyshuarit mashkull kosovar, është gjetur dhe sekuestruar: një pushkë gjuetie, 153 fishekë, disa karikatorë, disa pajisje të armës, tri thika, një bajonetë, 115 gëzhoja dhe një sëpatë. Rasti është duke u hetuar”, thekson policia.

Albert Sylaj dyshohet se të dielën mbrëma vrau me sëpatë ish-kunatën e tij, Arlinda Zekajn, disa minuta pasi ajo ishte kthyer nga komisariati i policisë. I dyshuari vazhdon të jetë në kërkim.

Ngjarja ka tronditur vendin teksa viktima para ngjarjes kishte kërkuar ndihmë nga autoritetet. Ajo gjithashtu kishte dërguar letra autoriteteve duke i konsideruar si shpresa e fundit teksa njoftuar se jeta e saj rrezikohej.

Viktima ditën kur ndodhi ngjarja e rëndë kishte njoftuar policinë për dhunë në familje. Lidhur me këtë kallëzim ishte arrestuar bashkëshorti i saj i cili ishte ndaluar më pas për 48 orë. Pas kthimit të saj në banesë, rreth orës 21:10, policia ishte njoftuar se gruaja ishte gjetur pa shenja jete.