Protestat e zhvilluara në Shqipëri kanë krijuar pasiguri te një pjesë e operatorëve turistikë në Gjirokastër, ku pavarësisht se sezoni turistik po shkon drejt fundit dhe rezervimet vijojnë të jenë aktive, janë raportuar anulime kryesisht nga vizitorët vendas. Situata ka ngritur shqetësime për ndikimin që zhvillimet në vend mund të kenë në lëvizjen e turistëve dhe aktivitetin e bizneseve që operojnë në sektorin e turizmit.
Kryetari i Odës së Tregtisë, Maksi Hoxha u shpreh se deri më tani protestat nuk kanë ndikuar drejtpërdrejt te turistët e huaj që vizitojnë Gjirokastrën, pasi rajoni ndodhet në fund të sezonit turistik.
Ai theksoi se rezervimet e fundit janë aktive deri më 31 tetor, ndërsa më pas aktiviteti turistik pritet të qetësohet.
Hoxha nënvizoi se grupet turistike që kanë qenë në Tiranë kanë hasur vështirësi për të vijuar itineraret e tyre dhe për të realizuar vizitat e planifikuara.
“Kjo protestë e agravuar po zhvillohet në Tiranë dhe në rajonin e Gjirokastrës nuk jemi ndikuar. Ne jemi në fund të sezonit, janë aktive rezervimet e fundit deri më 31 tetor dhe pastaj bie në qetësi. Për të huajt s’ka ndikim. Nga vizitorët vendas besoj se ka pasur, besoj, por nuk e di. Ndërsa për të huaj jo, se siç e thashë, jemi në fund të sezonit. Protesta është e drejtë kushtetuese, në rajonin tonë nuk ka problematikë. Grupet turistike që kanë qenë në Tiranë e kanë pasur të vështirë të lëvizin për vizita. Nëse kjo do vazhdojë, do e shohim në vazhdim si do shkojë. Një gjë dua të them: E drejta për të protestuar nuk diskutohet, por të bëjnë kujdes me bizneset private, se janë ngritur në mund dhe janë në mbijetesë. Pra, protestuesit të jenë më dashamirës me biznesin privat.”- ka shprehur Hoxha.