Presidenti i LaLiga-s, Javier Tebas, ka reaguar pas polemikave të shkaktuara nga deklaratat e Kylian Mbappé për Mao Ce Dunin, duke kërkuar falje publike ndaj popullit kinez. Çështja ka marrë përmasa diplomatike dhe tregtare, duke rrezikuar marrëdhëniet e futbollit spanjoll me një prej tregjeve më të rëndësishme në Azi.

Përmes një mesazhi në rrjetin social X, Tebas shprehu keqardhjen në emër të LaLiga-s për reagimet që kanë shkaktuar fjalët e sulmuesit të Real Madridit.

“E kuptojmë dëmin e shkaktuar dhe, në emër të LaLiga-s, dëshiroj t'i përcjell popullit kinez ndjesën tonë më të sinqertë”, deklaroi drejtuesi i futbollit spanjoll.

Polemika nisi pas një interviste, gjatë së cilës Mbappé tregoi se një prej memeve të tij të preferuara ishte një montazh ku fytyra e tij vendosej mbi trupin e Mao Ce Dunit, të cilin e përshkroi si “diktatorin kinez”.

Deklarata shkaktoi reagime të forta në Kinë, me pasoja të menjëhershme edhe në aspektin tregtar. Sipas raportimeve, televizioni shtetëror kinez CCTV pezulloi transmetimet e ndeshjeve të kampionatit spanjoll, ndërsa disa kompani vendase ndërprenë kontratat e sponsorizimit me futbollistin francez.

Përballë kësaj situate, Tebas theksoi se një episod i vetëm nuk duhet të dëmtojë marrëdhëniet e ndërtuara ndër vite mes LaLiga-s dhe Kinës.

“Nuk mund të lejojmë që veprimi i një individi të njollosë këtë marrëdhënie apo të dëmtojë më shumë se 20 klubet e garave tona profesionale dhe miliona tifozë kinezë”, u shpreh ai.

Kreu i LaLiga-s bëri gjithashtu të ditur se organizata po punon drejtpërdrejt me partnerët dhe përfaqësuesit e saj në Kinë për të kapërcyer krizën.

“Angazhimi ynë ndaj Kinës, popullit të saj dhe institucioneve të saj është i palëkundur. Një marrëdhënie e ndërtuar gjatë kaq shumë vitesh nuk mund të dëmtohet nga një episod individual”, përfundoi Tebas.

Ndërkohë, polemika ka detyruar edhe Mbappé-n të reagojë publikisht, duke kërkuar falje për deklaratat e tij. LaLiga synon tashmë të kufizojë pasojat e kësaj çështjeje dhe të mbrojë interesat e klubeve spanjolle në tregun kinez.