Senatori brazilian Flavio Bolsonaro është larguar nga vendi drejt Shteteve të Bashkuara, pasi humbi zgjedhjet presidenciale të së dielës, thanë të martën pasdite tri burime. Departamenti Amerikan i Shtetit pritet t’i pajisë atë dhe familjen e tij me viza hyrjeje.
Bolsonaro, i cili ende nuk e ka pranuar humbjen përballë presidentit aktual të majtë, Luiz Inacio Lula da Silva, u largua nga Brazili pasi refuzoi të zbatonte një urdhër të Gjykatës së Lartë për të dorëzuar pasaportat, shkruan Reuters.
Vendimi gjyqësor lidhet me një hetim për pastrim parash, në të cilin ai mohon të ketë kryer shkelje. Vendndodhja e Flavios, bashkëshortes së tij dhe dy vajzave nuk dihej menjëherë. Një burim pranë familjes tha se Flavio kishte mbërritur në Florida, por refuzoi të tregonte se ku ndodhej.
“Departamenti i Shtetit do t’i lëshojë viza Flavio Bolsonaros dhe familjes së tij, duke u lejuar hyrjen në Shtetet e Bashkuara”, tha një zyrtar i lartë i Departamentit të Shtetit.
Përkeqësohet përplasja mes Brazilit dhe SHBA-së
Largimi i Bolsonaros rrezikon të thellojë përçarjen mes dy vendeve më të populluara të Amerikës. Lula ka akuzuar Uashingtonin se po bashkëpunon me familjen Bolsonaro për ta rikthyer atë në pushtet. Reuters raportoi, përpara zgjedhjeve të së dielës, për një fushatë të Departamentit Amerikan të Shtetit që synonte rikthimin e tyre në pushtet.
Trump ka pretenduar më herët se babai i Flavios, ish-presidenti Jair Bolsonaro, ishte viktimë e persekutimit gjyqësor në Brazil. Edhe Jair Bolsonaro u largua drejt Shteteve të Bashkuara pasi refuzoi ta pranonte fitoren e Lulës në vitin 2022, kur në detyrë ishte ish-presidenti amerikan Joe Biden.
Ai u kthye përfundimisht në Brazil, por më vonë u dënua me 27 vjet burg për komplot për grusht shteti, pasi mbështetësit e tij sulmuan ndërtesat qeveritare në Brasilia.
Trump nuk e përmendi largimin e Flavio Bolsonaros në deklaratat për shtyp të hënën, por tha se votimi në Brazil “dukej si një tjetër zgjedhje e manipuluar”.
Duke folur në Brasilia, Lula tha se sapo kishte dëgjuar që Flavio ishte larguar nga vendi. Ai e cilësoi këtë veprim si të turpshëm dhe tha se Bolsonaro duhej të kishte qëndruar në Brazil për të provuar pafajësinë e tij.
Bolsonaro shihej si favorit për të fituar zgjedhjet presidenciale të së dielës, por përfundoi duke humbur ndaj Lulës, në një rezultat të papritur.
Urdhërohet të dorëzojë pasaportat
Të hënën, Bolsonaros iu dhanë 24 orë për të dorëzuar pasaportat, por ato u anuluan pasi afati përfundoi, thanë dy burime.
Në një vendim gjyqësor të siguruar nga Reuters, Gjykata e Lartë përmendi rrezikun që Bolsonaro të largohej nga Brazili dhe “burimet e tij të konsiderueshme financiare” si arsye për urdhërimin e sekuestrimit të pasaportave.
Bolsonaro, të cilit i hiqet imuniteti nga ndjekja penale kur mandati i tij si senator përfundon në shkurt, tha të hënën se nuk kishte ndërmend të arratisej.
“Nuk e kam menduar kurrë largimin nga vendi”, tha ai. “Do t’i dorëzoj pasaportat dhe do të mbrohem kundër kësaj farse, e cila është një përpjekje e qartë për të më intimiduar.”
Largimi i tij duket se e ka zënë në befasi drejtuesin e fushatës së tij.
“Jemi të befasuar nga ky lajm, sepse vetëm dje diskutuam nevojën që Flavio, duke pasur parasysh 60 milionë votat që mori, të merrte përsipër rolin e liderit të opozitës”, u tha gazetarëve senatori Rogerio Marinho.
Duke ndjekur gjurmët e të atit
Megjithëse Bolsonaro ende nuk e ka pranuar zyrtarisht humbjen — të dielën ai tha se do të kërkonte anulimin e rezultatit për shkak të parregullsive të pretenduara në votim — partia e tij, Partia Liberale, deklaroi të hënën se e pranonte fitoren e Lulës.
Mbetet e paqartë se si Bolsonaro arriti të largohej nga vendi, ndërkohë që kishte një afat prej 24 orësh për të dorëzuar pasaportat. Një zyrtar i lartë i Policisë Federale tha se Bolsonaro nuk ishte larguar nga vendi përmes ndonjë pike të zakonshme të kontrollit kufitar.
Eduardo Bolsonaro, vëllai më i vogël i Flavios, i cili jeton në Shtetet e Bashkuara, tha përpara votimit se humbja në zgjedhje do të kërkonte largimin e tij nga Brazili.
“Nëse vëllai im nuk fiton, unë jam pro që ai të largohet nga vendi”, i tha ai këtë muaj podkasterit Steven Crowder.
