Presidenti amerikan, Donald Trump po shqyrton heqjen e sanksioneve ndaj fondit qeveritar rus të investimeve, siç raportoi The New York Times duke cituar një zyrtar amerikan të paidentifikuar.
Shtëpia e Bardhë po vlerëson se si mund të hiqen sanksionet ndaj fondit për të përmirësuar marrëdhëniet dypalëshe me Moskën dhe për të ndihmuar në përfundimin e luftës së Rusisë kundër Ukrainës, tha zyrtari.
Zyrtarët rusë kanë kërkuar gjithashtu heqjen e sanksioneve amerikane ndaj fondit të investimeve, për shkak të përfshirjes së kësaj strukture financiare në marrëveshjen e Trump-it për naftë dizel me Rusinë, njoftuan persona të informuar për çështjen për The New York Times.
Më 9 tetor, Trump tha se Rusia kishte rënë dakord të furnizonte miliona tonë naftë dizel për Shtetet e Bashkuara dhe tregjet globale, pas një telefonate me presidentin rus, Vladimir Putin.
Rusia do të furnizojë menjëherë mbi 300.000 tonë naftë dizel për tregun amerikan dhe global, edhe 500.000 tonë gjatë muajit nëntor dhe 1.000.000 tonë menjëherë pas kësaj, shkroi ai në Truth Social.
Anija e parë që mbante 40.000 tonë metrikë naftë dizel ruse nisi pastaj udhëtimin drejt Nju Jorkut dhe pritet të mbërrijë në fillim të nëntorit, raportoi Reuters më 23 tetor, duke cituar të dhëna nga London Stock Exchange Group.
Tankerí i flamurit maltez ngarkoi ngarkesën në portin rus të Baltikut, Primorsk, më 22 tetor dhe pritet të mbërrijë në SHBA më 7 nëntor, sipas agjencisë.
Zyrtarët ukrainas frikësohen gjithashtu se Shtëpia e Bardhë mund të shqyrtojë një marrëveshje që përfshin industrinë ruse të plehrave kimike, deklaruan dy persona të informuar për Kyiv Independent, në një artikull të botuar më 23 tetor.
