Ushtria ukrainase ka realizuar një operacion të pazakontë pranë qytetit të Kupianskut, në rajonin e Harkivit, duke depërtuar përmes tubacioneve nëntokësore të gazit për të hyrë në pozicionet ruse. Operacioni, i koduar “Veles”, synoi të pengonte infiltrimin e forcave ruse dhe të forconte pozicionet mbrojtëse të Ukrainës në këtë zonë strategjike.

Sipas presidentit ukrainas, Volodymyr Zelensky, ushtarët ukrainas përshkuan më shumë se 15 kilometra nëpër rrjetin nëntokësor. Ai deklaroi të martën se mbi 100 ushtarë rusë janë vrarë dhe më shumë se 30 të tjerë janë kapur rob gjatë operacionit.

Misioni u realizua nga Korpusi i Dytë “Khartiia” i Gardës Kombëtare, në bashkëpunim me njësi të tjera ukrainase. Përparimi nëpër tubacione u koordinua me sulme në sipërfaqe dhe goditje të njëkohshme me dronë, me synimin për të dobësuar pozicionet ruse dhe për të penguar lëvizjen e trupave të tyre drejt prapavijës ukrainase.

Një pjesë e rrugës nëntokësore përfshinte një tubacion gazi me diametër vetëm 1.2 metra, duke i detyruar ushtarët të lëviznin në hapësira shumë të ngushta. Sipas një burimi nga Korpusi “Khartiia”, të cituar nga gazeta ukrainase Ukrainska Pravda, trupat përparuan disa kilometra brenda tubacionit, ku u përballën edhe me ushtarë rusë.

Operacioni kërkoi përgatitje të gjera, përfshirë stërvitje për luftime në hapësira të kufizuara dhe zhvillimin e zgjidhjeve teknologjike për orientimin, komunikimin dhe mbështetjen jetësore të ushtarëve gjatë lëvizjes nëntokësore, transmeton Telegrafi.

Veçantia e operacionit “Veles” qëndron edhe te fakti se Ukraina përdori një taktikë që më parë ishte shfrytëzuar nga Rusia. Në shtator të vitit 2025, grupi ukrainas për monitorimin e fushëbetejës DeepState raportoi se trupat ruse kishin përdorur një tubacion gazi nën lumin Oskil për të depërtuar në pozicionet ukrainase pranë Kupianskut, duke anashkaluar linjat e zakonshme të mbrojtjes.


Sipas Zelenskyt, forcat ukrainase e kanë përshtatur dhe modernizuar këtë taktikë, duke e bërë më të sofistikuar dhe më të avancuar nga ana teknologjike.

Korpusi “Khartiia” publikoi për herë të parë detaje për operacionin më 22 tetor, duke thënë se misioni kishte penguar përpjekjet ruse për të depërtuar në pozicionet ukrainase rreth Kupianskut. Kombinimi i lëvizjeve nëntokësore me sulmet në sipërfaqe synonte t’ua vështirësonte forcave ruse përdorimin e rrjetit të tubacioneve për të arritur në prapavijën e mbrojtjes ukrainase.

Kupiansku mbetet një pikë strategjike në verilindje të Ukrainës dhe një nga zonat ku Rusia ka vazhduar operacionet sulmuese. Zelenskyy e cilësoi “Veles” si operacionin e tretë të madh ushtarak ukrainas gjatë këtij viti.

Sipas presidentit, operacioni i parë, i zhvilluar nga Forcat Sulmuese Ajrore të Ukrainës në sektorin e Oleksandrivkës, në pjesë të rajoneve të Dnipropetrovskut, Donjeckut dhe Zaporizhias, çliroi më shumë se 800 kilometra katrorë territor. Operacioni i dytë, i koduar “Vivaldi”, u zhvillua në rajonin e Donjeckut, ku, sipas tij, u rimorën mbi 200 kilometra katrorë në zona të përfshira nga sulme të përsëritura ruse.

Zelensky tha se operacioni “Veles” po forcon pozicionet ukrainase pranë Kupianskut dhe dëshmon se Rusia nuk i ka arritur objektivat e përcaktuara nga udhëheqja e saj politike.

“Ne po mbrojmë jetën e njerëzve tanë, po u shkaktojmë humbje pushtuesve dhe po i përmbushim objektivat tona në sektorin e Kupianskut”, deklaroi presidenti ukrainas. /Telegrafi/

EvropaNga BotaBotë