Gjenden mbetje mortore në Mitrovicë të Veriut, dyshohet se i përkasin viktimave të luftës në Kosovë

Në varrezat e qytetit të Mitrovicës së Veriut janë gjetur mbetje mortore të cilat dyshohet se mund t’u përkasin viktimave të luftës së fundit në Kosovë.

Kryesues i Komisionit Qeveritar për Persona të Zhdukur, Agron Limani ka bërë me dije gërmime po zhvillohen teksa ky operacion është vazhdimësi e gërmimeve që janë kryer më 20 tetor.

Sipas tij, mbetjet mortore janë dërguar në Institutin e Mjekësisë Ligjore për ekzaminimet e nevojshme, përfshirë analizat e ADN-së, me qëllim identifikimin e viktimave.

Gërmimet dhe gjetja e mbetjeve mortore në Mitrovicë të Veriut vijnë pasi në Zubin Potok u gjetën tre varreza masive dhe u gjetën mbetjet mortore të të paktën 23 personave. Autoritetet i identifikuan ata si “Grupi i Intelektualëve”.

Grupi prej 23 “intelektualëve” ishte një grup shqiptarësh, mes tyre profesionistë dhe figura publike nga zona e Mitrovicës, të cilët u zhdukën në zonën e Zubin Potokut më 19 prill të 1999-ës.

Kosova ka arrestuar disa persona lidhur me vrasjen e civilëve që lidhen me “Grupin e Intelektualëve”. Sipas Institutit të Krimeve të Kryera Gjatë Luftës në Kosovë, 1.577 persona vazhdojnë të jenë të zhdukur nga lufta e viteve 1998-1999, ndërsa janë dokumentuar gjithsej 12.230 viktima të luftës.