Kryeministri Rama: Hiqet taksa e qarkullimit nga nafta, çmimi në pompë ulet me 32 lekë për litër

Çmimi i naftës në pikat e karburanteve do të ulet me 32 lekë për litër, pas heqjes së taksës së qarkullimit nga çmimi i shitjes, sipas një mase të re të njoftuar nga Kryeministri Edi Rama gjatë prezantimit të Paketës Fiskale 2027, pas mbledhjes së qeverisë të mërkurën.

“Një lajm shumë i pritur, që nuk e sjell dëshira e qeverisë dhe e imja, është heqja e taksës së qarkullimit nga çmimi i naftës dhe do të ulim automatikisht çmimin e naftës në pompë me 32 lekë për litër”, deklaroi Rama.

Aktualisht, taksa e qarkullimit është 27 lekë për litër, si për naftën, ashtu edhe për benzinën. Duke përfshirë Tatimin mbi Vlerën e Shtuar (TVSH) prej 20%, kjo taksë përfaqëson 32.4 lekë për litër në çmimin përfundimtar të karburanteve. Sipas ndryshimit të njoftuar nga qeveria, taksa e qarkullimit nuk do të mblidhet më përmes çmimit të naftës, por do të zhvendoset te automjetet.

“Ndërkohë, taksën do ta vendosim te makina dhe do ta mbledhim përmes drejtorisë përkatëse”, tha Kryeministri.

Rama njoftoi gjithashtu një detyrim të ri fiskal për automjetet e huaja që hyjnë në Shqipëri.

“Do të vendosim taksë të re për makinat e huaja që hyjnë në territorin e Republikës së Shqipërisë”, deklaroi ai.

Taksa e qarkullimit mbi karburantet u vendos në vitin 2011, fillimisht në nivelin 5 lekë për litër, dhe u rrit gradualisht në vitet pasuese. Që prej vitit 2015, niveli i saj është 27 lekë për litër, pa përfshirë TVSH-në. Gjatë prezantimit të masës, Kryeministri nuk dha hollësi mbi nivelin e taksës që do të zbatohet për automjetet, mënyrën e përllogaritjes së saj apo tarifën që do të paguajnë automjetet me targa të huaja.