“Vrasja e grave, urgjencë kombëtare”/ Protestë në Kosovë pas vrasjes së Arlinda Zekajt nga kunati i saj, hidhen fishekzjarrë drejt godinave të prokurorisë dhe policisë

Në protestë kanë marrë pjesë edhe familjarët e saj, duke u bashkuar në thirrjen për trajtimin e vrasjeve të grave si një urgjencë kombëtare.

Protesta u zhvillua me mesazhin “Vrasja e grave duhet të trajtohet si urgjencë kombëtare”, duke vënë në qendër nevojën për vëmendje ndaj dhunës dhe vrasjeve të grave.

Organizimi i protestës nga Kolektivi për Mendim dhe Veprim Feminist vjen pas rastit të Arlinda Zekajt, ndërsa pjesëmarrja e familjarëve të saj ishte në protestën kundër dhunës ndaj grave.

Protestuesit kanë hedhur fishekzjarrë në drejtim të Prokurorisë së Shtetit dhe godinës së Policisë së Shtetit.

Protestuesit kanë shkruar mesazhe në godinën e Ministrisë së Drejtësisë, kanë hedhur bojë të kuqe në objektin e Policisë dhe kanë kërkuar shkarkimin e Donikës Gërvallës para godinës së Qeverisë.

“Pa drejtësi nuk ka drejtësi” është një nga mesazhet e shkruara në objektin e Ministrisë së Drejtësisë, ndërsa thirrjet “Dorëheqje”, “Shkarkojeni Donikën” dhe “Donika ik” kanë mbizotëruar gjatë protestës para institucioneve.

Hyrja e godinës së Qeverisë është ngjyrosur me bojë të kuqe, ndërsa në objekt janë shkruar edhe fjalët e fundit të Arlinda Zekajt drejtuar institucioneve.

Protestuesit kanë deklaruar se do të qëndrojnë para godinës së Qeverisë, duke kërkuar përgjegjësi dhe reagim nga institucionet për dhunën dhe vrasjen e grave.

“Nuk ka më protesta paqësore”, ka deklaruar Liridona Sijarinja, duke paralajmëruar vijimin e qëndrimit para Qeverisë.

“Sonte rrimë këtu. E ju ftojmë nesër që përsëri të vini këtu në orën 16:00”, ka shtuar ajo.

Gjatë protestës, Sijarinja ka ngritur edhe pyetjen: “Edhe sa kufoma tjera duhet që ky shtet të na marrë seriozisht?”

Protesta është zhvilluar nën thirrjen “Bashkë për Arlindën”, me kërkesën për drejtësi dhe përgjegjësi institucionale pas vrasjes së Arlinda Zekajt.

Top Channel