Presidenti amerikan Donald Trump deklaroi se një takim mes presidentit ukrainas Volodymyr Zelensky dhe liderit rus Vladimir Putin do të organizohet shumë shpejt, duke pretenduar se përpjekjet për t’i dhënë fund luftës së Rusisë kundër Ukrainës po bëjnë përparim.

“Po bëjmë shumë përparim me Rusinë dhe Ukrainën. Do të organizohet një takim shumë shpejt,” u tha Trump gazetarëve. Kur u pyet se kush do të merrte pjesë në takim, Trump sqaroi se kishte parasysh Zelensky-n dhe Putinin.

Ai nuk dha asnjë datë, vendndodhje apo detaje për ndonjë marrëveshje konkrete për zhvillimin e bisedimeve. Deklaratat vijnë pas kontakteve të fundit diplomatike të SHBA-së me Kievin dhe Moskën për një rivendosje të mundshme të negociatave.

Putin më parë kishte shprehur gatishmëri për të rifilluar bisedimet trelaterale mes Rusisë, Ukrainës dhe Shteteve të Bashkuara në mes të nëntorit. Zelensky ka thënë se Ukraina është e gatshme të marrë pjesë në negociata të tilla, madje edhe me njoftim të shkurtër, por ka theksuar se përparimi varet nga Rusia.

“Ne prisnim gjithashtu një takim trelateral në tetor. Por ai nuk u realizua sepse rusët gjetën një arsye tjetër për të mos u takuar,” tha Zelenskyy.

As Kiev as Moska nuk kanë konfirmuar ende organizimin e takimit bilateral që përshkroi Trump.

/rtsh.al/