Mick Schumacher (27), djali i legjendës së Formula 1, Michael Schumacher, rrallëherë flet publikisht për marrëdhënien me të atin.
Megjithatë, në dokumentarin e Netflix-it, “Schumacher”, ai ka rrëfyer hapur se sa shumë i mungojnë bisedat me babanë, veçanërisht tani që edhe vetë e di se çfarë do të thotë të jesh pilot profesionist.
“Unë dhe babai kuptohemi në një mënyrë të veçantë, sepse flasim të njëjtën gjuhë – gjuhën e automobilizmit”, ka thënë Mick në dokumentarin e realizuar në bashkëpunim me familjen Schumacher.
Michael Schumacher, shtatë herë kampion bote në Formula 1, pësoi lëndime të rënda në një aksident me ski në Méribel të Francës, në dhjetor të vitit 2013. Që nga ajo kohë, ai nuk është shfaqur më publikisht, ndërsa familja e tij pothuajse asnjëherë nuk ka folur për gjendjen e tij shëndetësore. Mick ishte vetëm 14 vjeç kur ndodhi aksidenti.
Në dokumentar, Mick ka pranuar se shpesh mendon për të gjitha gjërat që do të mund të ndante sot me të atin, veçanërisht për përvojat e tij në botën e automobilizmit.
“Besoj se unë dhe babai do ta kuptonim njëri-tjetrin ndryshe tani, pikërisht sepse flasim të njëjtën gjuhë, gjuhën e automobilizmit. Do të kishim aq shumë gjëra për të diskutuar. Për këtë mendoj më së shumti. Do të hiqja dorë nga gjithçka vetëm që ta kisha këtë mundësi”, ka rrëfyer ai.
Mick ka folur edhe për mungesën e momenteve që dikur i kalonte me të atin.
“Pas aksidentit, ato momente nuk ekzistojnë më, ato çaste që shumë njerëz të tjerë i ndajnë me prindërit e tyre. Mendoj se kjo është disi e padrejtë”, ka pranuar ai.
Pavarësisht gjithçkaje, Mick ruan shumë kujtime të bukura nga fëmijëria e kaluar me babanë, nënën Corinna dhe motrën Gina-Maria.
“Kur mendoj për të kaluarën, më kujtohen kryesisht ne të katërt duke u argëtuar së bashku. Më kujtohet kur ngisnim kartingë nëpër fshat, kur kalëronim poni dhe kalonim kohë së bashku. Këto janë kujtime që më bëjnë të lumtur”, ka treguar ai.
Familja Schumacher prej vitesh e mbron me përpikëri privatësinë e Michaelit. Bashkëshortja e tij, Corinna, ka shpjeguar në dokumentar se edhe para aksidentit, Michaelit i kishte kushtuar rëndësi të veçantë ndarjes së jetës private nga ajo publike.
Ashtu si babai i tij, edhe Mick zgjodhi karrierën në automobilizëm. Në vitin 2018, ai fitoi titullin e kampionit evropian në Formula 3, ndërsa dy vjet më vonë u shpall kampion i Formula 2. Këto suksese i hapën rrugën drejt Formula 1, ku garoi për ekipin Haas.
Edhe pse gjatë karrierës së tij është krahasuar shpesh me Michaelin, Mick ka theksuar vazhdimisht se dëshiron të krijojë historinë dhe sukseset e veta.
“Unë mund të ndërtoj trashëgiminë time, duke admiruar njëkohësisht gjithçka që ka arritur babai im”, ka thënë ai.
Megjithatë, Mick nuk e fsheh se sa shumë do të dëshironte të diskutonte me të atin për garat dhe përvojat në pistë. Siç ka pranuar në dokumentar, pikërisht këto biseda janë ndër gjërat që i mungojnë më së shumti.
