Kush gaboi në aksidentin me 68 të vdekur? Publikohen regjistrimet audio mes qendrës së kontrollit dhe makinistëve

Cadena SER dhe El País kanë siguruar këtë të mërkurë regjistrimet audio të bisedave mes punonjësve të qendrës së kontrollit të Adif-it dhe makinistëve të trenave, të zhvilluara pak minuta përpara aksidentit tragjik hekurudhor, ku humbën jetën të paktën 68 persona, pas përplasjes së një treni AVE me një tren Iryo që qëndronte i ndaluar në shina.

Regjistrimet pasqyrojnë komunikimet që nga momenti kur sistemi i sigurisë LZB pësoi defekt në zonën e Urda-s. Menjëherë pas ndërprerjes së funksionimit të këtij sistemi, makinisti i trenit AVE telefonon qendrën e kontrollit për të mësuar se çfarë ka ndodhur. Ai njoftohet se sistemi ka pësuar një defekt.

Më pas, kontrollori i jep trenit AVE urdhrin për të rifilluar “lëvizjen normale”. Të njëjtin udhëzim merr edhe makinistja e trenit Iryo, por shtatë minuta më vonë ajo telefonon sërish qendrën e kontrollit për të njoftuar se treni vazhdon të jetë i ndaluar, pasi nuk arrin ta vërë në lëvizje. Ky informacion, sipas regjistrimeve, nuk i përcillet trenit AVE nga qendra e kontrollit në Atocha.

Më pas krijohet një situatë konfuzioni, gjatë së cilës kontrollori duket se ka shumë dyshime. Në fund, megjithatë, jepet një urdhër që bie qartësisht ndesh me protokollin: rifillimi i lëvizjes normale pa u verifikuar nëse treni përpara ishte larguar në një distancë të mjaftueshme, mbi 30 kilometra, për të shmangur një përplasje.

Regjistrimet pasqyrojnë gjithashtu bisedën me makinisten e Iryo-s, ku evidentohen edhe gabime të tjera. Fillimisht, asaj i shpjegohet çfarë ka ndodhur dhe pse treni është ndaluar: defekti i sistemit LZB.

Pas disa komunikimeve, qendra e kontrollit i kërkon të shkëputë sistemin, ta rilidhë dhe të rifillojë lëvizjen. Megjithatë, disa minuta më vonë, makinistja e Iryo-s telefonon për të thënë se nuk mund të niset, sepse nuk arrin të kontrollojë sistemin LZB. Pavarësisht këtij njoftimi, kontrollori nuk merr masa të menjëhershme, siç do të ishte urdhërimi i trenit AVE të ndalonte.

Makinistes i thuhet të rifillojë lëvizjen sapo të jetë e mundur. Në këtë moment nisin edhe bisedat e brendshme në qendrën e kontrollit, ku dëgjohet një gjendje e dukshme konfuzioni.

“Vërtet, shok. Vërtet. Treni 6071 ka probleme me pajisjet. Po ecën derisa të ndalet. Kishte një udhëzim 40 që të vazhdonte në BSL. Nuk kemi ndryshuar gjë. Një moment”, dëgjohet në regjistrim.

Megjithatë, vetëm pesë minuta pas kësaj bisede, ndodh përplasja mes trenit AVE dhe atij Iryo, pa u kuptuar, me sa duket, nga askush se një tragjedi e tillë ishte gati të ndodhte.

Transkriptimi i plotë i telefonatës së makinistit të AVE-s me qendrën e kontrollit:

Makinisti: Atocha? Më ka dalë një defekt për shkak të bllokimit të pjesshëm 000. A më dëgjon?

Qendra e kontrollit: Po, po, të dëgjoj. Doja të të jepja numrin e telefonit.

Makinisti: Po më telefonon tashmë treni 2080.

Qendra e kontrollit: Në rregull, atëherë do t'i jap autorizimin. Duhet t'u kërkojmë ta shkëputin sistemin, sigurisht.

Makinisti: Diçka po ndodh.

Qendra e kontrollit: Për momentin, ke një pikë ndalimi dhe objektiv zero, apo jo?

Makinisti: Po.

Qendra e kontrollit: Është ndërprerë funksionimi i sistemit qendror në Urda. Prandaj po pyesim. Më kanë thënë të shohim nëse mund ta zgjidhin shpejt. Prit pak, sepse po vlerësojmë nëse duhet ta shkëputim sistemin apo jo. Një moment.

Makinisti: Në rregull, në rregull.

Qendra e kontrollit: Ta shkëput? BCL, apo jo, menjëherë? Mund të vazhdojë. Po, do ta shkëputim, në rregull?

Makinisti: Po, në rregull, dakord.

Qendra e kontrollit: Një moment, sepse më kanë lënë shënimin në fletë dhe këtë gjë gjithashtu… Vërtet, nuk e di…

Qendra e kontrollit: Shkëputja bëhet te… LZB4? Makinist i trenit, shkëputeni sistemin.

Makinisti: Po, me çfarë numri?

Qendra e kontrollit: Prit, po kontrolloja, sepse udhëzimi është ta shkëputësh dhe ta rilidhësh, ta shkëputësh dhe ta rilidhësh. Prit pak.

Qendra e kontrollit: Prisni një moment, po ngatërrohemi, sepse thonë se do ta rregullojnë. Një çast. Jo, duhet ta rilidhni. (Zhurmë.) Do të dështojë sërish. Është numri 4… Kur të kalojë Urda-n, problemi do të marrë fund dhe sistemi do të lidhet përsëri?

Makinisti: Në rregull, pra udhëzimi është ta rilidh. Pastaj, kur të kalojë Urda-n, ku nuk do t'i kemi më këto probleme, kur të kalojë pranë ndonjë CDI-je, do të rifillojë të funksionojë, apo jo? Është LZB4, ndërsa imi është 773.

Qendra e kontrollit: CRC Atocha për makinistin e trenit 2080, ora 08:36. Udhëzimi thotë: “Makinist i trenit 2080, shkëputeni dhe rilidheni sistemin LZB dhe rifilloni lëvizjen nën mbrojtjen e sistemit BSL, me lëvizje normale”.

Biseda mes qendrës së kontrollit dhe makinistes së trenit Iryo

Ora 08:41 – Telefonata e parë me Iryo-n

Makinistja: Mirëmëngjes, Atocha. Kam pasur një humbje të transmetimit gjatë lëvizjes në BZL. Treni pasues duhet të vazhdojë në linjën 113 me shpejtësi mbi 200. Por unë nuk kam marrë sinjalin e transmetimit. Jam e ndaluar, përpara sinjalit hyrës të Urda-s.

Qendra e kontrollit: Në rregull, prit pak. Udhëzimi thotë: “Makiniste e trenit 6076, shkëputeni sistemin dhe rilidheni”.

Makinistja: Dhe ta rilidh përsëri.

Qendra e kontrollit: Rifilloni lëvizjen nën mbrojtjen e sistemit BFL, me lëvizje normale.

Ora 08:48 – Telefonata e dytë me Iryo-n

Makinistja: Treni nuk po më lejon ta kontrolloj sistemin LZB. Për këtë arsye, vazhdoj të jem e ndaluar përpara sinjalit hyrës.

Kontrollori: Në rregull. Dakord? Atëherë, sapo të mundeni, vazhdoni. Nëse keni ndonjë problem, na telefononi përsëri.

Makinistja: Në rregull, shumë mirë. Do t'ju njoftoj.