5 ditë pasi humbi ndjenjat, trajneri i Bayern Munich del nga spitali! Si paraqitet gjendja e tij

Trajneri i Bayern Munich, Vincent Kompany ka dalë nga spitali, konfirmoi të mërkurën asistenti i tij Aaron Danks, pesë ditë pasi humbi ndjenjat gjatë një seance stërvitore.

Kompany po ndiqte një seancë stërvitore për ekipin rezervë të klubit kur ndodhi incidenti të premten e kaluar.

Duke folur pas fitores 6-1 të Bayernit ndaj Magdeburgut në Kupën e Gjermanisë, Danks tha se nuk kishte një datë konkrete se kur Kompany mund të rikthehet në punë.

“Është padyshim një hap vërtet pozitiv në rrugën e tij drejt rikuperimit”, tha Danks për largimin e Kompany nga spitali.

“Ai mund të kthehet në shtëpi tani, të jetë më afër familjes së tij, të jetë më afër komoditetit në shtëpinë e tij, por është ende shumë e rëndësishme që ai të pushojë dhe të shërohet”, shtoi ai.

Danks tha se nuk kishte folur me Kompany-n për disa ditë.

“Shëndeti i tij është përparësia jonë numër 1 dhe për ne ai është ende në fazën e rikuperimit. Prandaj ne duam që ai të rikthehet në shëndet të plotë, në formë të plotë fizike dhe pastaj të na bashkohet,” shtoi Danks.