Deputetja e Lidhjes Demokratike të Kosovës, Hykmete Bajrami, ka shprehur kritika ndaj ministrit të Infrastrukturës, Dimal Basha, për projektet që ende nuk kanë përfunduar.
Ajo i ka kujtuar Bashës se ministrinë nuk e ka trashëguar nga LDK-ja, PDK-ja apo Aleanca, por nga një ministër i LVV-së.
Të lidhura
None found
Bajrami tha se tashmë e kupton arsyen pse rrugët dhe projektet e nisura vazhdojnë të mbeten të papërfunduara. Sipas saj, janë shpenzuar 80 milionë euro dhe pretendohet se 82% e punëve kanë përfunduar, ndërsa ministri ka deklaruar se do të angazhojë kompani ndërkombëtare për të kontrolluar cilësinë dhe sasinë e punimeve të realizuara.
“Po kërkon të kontraktosh kompani për të vlerësuar sasinë dhe cilësinë e punëve, si dhe për të hartuar projektimin për pjesën e mbetur. Këto janë veprime që duhet të kryhen në fillim të projektit, ministër. I ke paguar 82 milionë euro dhe tani dëshiron të kontrollosh cilësinë. Për mua, kjo është një dështim dhe ne kërkojmë përgjegjësi”, është shprehur Bajrami.
Ajo shtoi se Basha nuk e ka marrë ministrinë nga LDK-ja, PDK-ja apo Aleanca, por nga ministri i LVV-së, duke theksuar se qeverisja e tyre ka zgjatur gjashtë vjet. Në fund, Bajrami tha se zgjidhja më e mirë do të ishte hapja e tenderëve ndërkombëtarë dhe sjellja e një qeverie që do t’i përfundonte projektet.
