Pas humbjes së tretë në nëntë ndeshje kampionati, Juventus po përballet me një krizë të thellë, e cila kulmoi me një përballje të ashpër mes administratorit të deleguar dhe drejtorit të përgjithshëm, Giovanni Carnevali, dhe skuadrës në qendrën stërvitore Continassa. Carnevali, me tone të drejtpërdrejta, theksoi se situata aktuale është e papranueshme dhe se skuadra nuk mund të vazhdojë në këtë mënyrë, duke kërkuar një reagim të menjëhershëm. Megjithatë, ai konfirmoi besimin te trajneri Spalletti, duke theksuar se grupi i punës nuk do të preket, pavarësisht provës së vështirë ku është vënë besimi i klubit.
Me kërkesë të vetë trajnerit toskan, Juventus do të hyjë në grumbullim në JTC Continassa duke filluar nga nesër, në prag të duelit të rëndësishëm kundër Napolit të dielën mbrëma. Carnevali u ka kërkuar Bremerit dhe shokëve të tij një reagim të menjëhershëm, jo vetëm në rezultate, por edhe në qëndrimin dhe angazhimin gjatë ndeshjeve. Të gjithë lojtarët janë thirrur të japin përgjigjet e nevojshme për pronarët, klubin dhe tifozët, të cilët janë thellësisht të zhgënjyer nga performancat e fundit.
Në ndeshjen e fundit kundër Genoas, skuadra bardhezi nuk funksionoi pothuajse fare. Sipas Spallettit, lojtarët nuk arritën të kuptonin se “futbolli ka ndryshuar”, duke theksuar rëndësinë e fitimit të dueleve individuale, arritjes së parë te topat “e vështirë” dhe shfaqjes së një ndjeshmërie ndaj rrezikut që aktualisht mungon. Skuadra u shfry pas vështirësive të para, duke treguar mungesë karakteri.
Ndërsa tifozët ëndërrojnë për një rikthim të madh të Antonio Contes, për momentin, topi mbetet në duart e Luciano Spallettit. Grumbullimi i detyrueshëm do të shërbejë si një periudhë reflektimi dhe përgatitjeje intensive, ndërsa ndeshja e së dielës në “Allianz Stadium” kundër Napolit do të jetë një udhëkryq i ri dhe vendimtar për Juventusin në këtë vjeshtë plot drithërima.
Marrë nga La Gazzetta dello Sport