BQE lë të pandryshuara normat e interesit, paralajmëron rritje të inflacionit nga energjia

Banka Qendrore Europiane (BQE) vendosi të mbajë të pandryshuara normat bazë të interesit në mbledhjen e 29 tetorit, ndërsa paralajmëroi se rritja e çmimeve të energjisë po shton rreziqet për inflacion më të lartë dhe ngadalësim të rritjes ekonomike në Eurozonë. Këshilli Drejtues i BQE-së vendosi të mbajë normën e interesit për depozitat në 2.50%, normën kryesore të rifinancimit në 2.65% dhe normën e huadhënies marxhinale në 2.90%.

Në njoftimin zyrtar, BQE thekson se rritja e vazhdueshme e çmimeve të energjisë po ushtron presion mbi perspektivën ekonomike, duke krijuar njëkohësisht rreziqe për stabilitetin e çmimeve dhe aktivitetin ekonomik.

“Çmimet e energjisë kanë vijuar të rriten, duke paraqitur rreziqe për rritjen e inflacionit dhe për dobësimin e perspektivës së rritjes ekonomike”, thuhet në deklaratën e BQE-së.

Sipas bankës qendrore, ndikimi i plotë i goditjes nga çmimet e energjisë ende nuk është materializuar. Megjithatë, deri tani inflacioni bazë ka mbetur përgjithësisht i qëndrueshëm, ndërsa pagat nuk kanë shfaqur reagim të ndjeshëm ndaj zhvillimeve të fundit.

BQE paralajmëron se përmasat dhe kohëzgjatja e goditjes energjetike, së bashku me efektet e saj të tërthorta dhe ato që mund të shfaqen në një fazë të mëvonshme, pritet të ndikojnë në rritjen e inflacionit dhe dobësimin e aktivitetit ekonomik.

Një tjetër faktor i evidentuar në deklaratë është shtrëngimi i kushteve të financimit që nga mbledhja e mëparshme e Këshillit Drejtues.

“Kushtet e financimit janë shtrënguar që nga mbledhja e fundit e Këshillit Drejtues, çka pritet të rëndojë mbi inflacionin dhe rritjen ekonomike”, thekson institucioni.

BQE rithekson angazhimin për të garantuar stabilizimin e inflacionit në objektivin prej 2% në afatin e mesëm. Vendimet e ardhshme për normat e interesit do të mbështeten në të dhënat ekonomike dhe financiare, perspektivën e inflacionit dhe rreziqet që e shoqërojnë atë. Institucioni thekson se do të vijojë të marrë vendime në çdo mbledhje, pa u angazhuar paraprakisht për një trajektore të caktuar të normave të interesit. Ndërkohë, portofolet e programeve të blerjes së aktiveve (APP) dhe të blerjeve emergjente gjatë pandemisë (PEPP) po zvogëlohen gradualisht, pasi Eurosistemi nuk riinveston më shumat e arkëtuara nga titujt që arrijnë maturimin.

BQE nënvizon se mbetet e gatshme të përshtatë instrumentet e politikës monetare, nëse kjo është e nevojshme për të ruajtur stabilitetin e çmimeve dhe funksionimin e mekanizmit të transmetimit të politikës monetare.