Transferimi i Erion Veliajt nga IEVP e Durrësit në atë të Fierit ka ngritur shqetësime të reja serioze lidhur me kushtet e tij të sigurisë dhe trajtimit institucional.
Avokati i tij mbrojtës, Plarent Ndreca, deklaroi se klienti i tij ndodhet i vendosur në të njëjtin korridor me tre persona të dënuar me burgim të përjetshëm. Mes tyre është edhe vrasësi serial i njohur, Dan Hutra, i dënuar për ekzekutimin e tre grave dhe plagosjen e tre të tjerave brenda pak minutave në Tiranë gjatë vitit 2023, ngjarje për të cilën Veliaj mbajti më parë një qëndrim të fortë publik.
Historia kriminale e Dan Hutrës përfshin gjithashtu vrasjen e bashkëshortes së tij të parë në vitin 2007, si dhe dënime të shumta për vepra të rënda penale. Vendosja e ish-kryebashkiakut të Tiranës në një korridor me persona me rrezikshmëri të lartë shoqërore vjen në një kohë kur mbrojtja ka denoncuar edhe kushtet e ambientit ku ai po mbahet në observim.
