Gjykata e Lartë cakton më 10 dhjetor seancën për Saimir Tahirin

Gjykata e Lartë ka caktuar datën 10 dhjetor për shqyrtimin e çështjes gjyqësore ndaj ish-ministrit të Brendshëm, Saimir Tahiri.

Tahiri kërkon pafajësi, ndërsa Prokuroria e Posaçme, në rekursin e saj, kërkon dënimin e tij për veprat penale të trafikut të drogës dhe pjesëmarrjes në grup të strukturuar kriminal.

Ish-ministri i Brendshëm është dënuar nga Gjykata e Shkallës së Parë dhe Gjykata e Apelit vetëm për veprën penale të shpërdorimit të detyrës, ndërsa akuzat për trafik droge dhe grup të strukturuar kriminal nuk janë pranuar nga gjykatat e dy shkallëve.

Rekursi ishte ushtruar nga palët që në vitin 2022.

Tahiri u dënua nga ish-Gjykata për Krime të Rënda me 3,4 vite burg, dënim që u konvertua në shërbim prove.

Pas qëndrimit prej afro 16 muajsh në qeli, ai u lirua nga Gjykata e Elbasanit, e cila caktoi që një pjesë të dënimit ta vuante duke qëndruar në shtëpi, për shkak të disa rrethanave familjare dhe arritjes së qëllimit për rehabilitimin e tij.