Gazetari Klodian Tomorri, deklaroi se Banka e Shqipërisë mund të luajë një rol më të fortë në parandalimin e pastrimit të parave, por sipas tij, institucioni nuk ka përdorur instrumentin më të fuqishëm që disponon: komunikimin publik.
I ftuar në emisionin ‘Task Force’ në SYRI TV, Tomorri argumentoi se guvernatori ose anëtarët e Këshillit Mbikëqyrës mund të paralajmëronin publikisht për flukset monetare që nuk rezultojnë nga kanale legjitime dhe që, sipas tij, mund të deformojnë treguesit monetarë dhe parametrat ekonomikë.
Gazetari theksoi se Banka e Shqipërisë vazhdon ta shpjegojë forcimin e lekut ndaj euros me fuqizimin e ekonomisë dhe rritjen e prurjeve nga turizmi. Ai sqaroi se dyshimet për rolin e flukseve të paligjshme nuk janë të njëjta me provimin ligjor se institucioni ka fshehur pastrimin e parave.
‘Sigurisht që Banka Qendrore mund ta bëjë më të vështirë pastrimin e parave përmes kuadrit rregullator që ajo u imponon bankave private, bankave të nivelit të dytë.
Sigurisht që instrumenti më i fuqishëm që ka, unë besoj që nuk është kuadri rregullator, por është komunikimi.
Pra, nëse guvernatori i Bankës së Shqipërisë, apo një anëtar i Këshillit Mbikëqyrës të Bankës së Shqipërisë do të dilte në media publikisht dhe do të thoshte që ‘ekonomia jonë po përmbytet nga flukse monetare të cilat ne nuk na rezultojnë në kanale legjitime dhe po na deformojnë treguesit monetarë dhe parametrat ekonomikë’, sigurisht që ky do të ishte një lajm, jo vetëm për mediat shqiptare, por do të ishte një lajm që do të referohej gjerësisht edhe në mediat ndërkombëtare…
Nuk e ka bërë Banka e Shqipërisë! Banka e Shqipërisë deri më sot vijon të mbajë qëndrimin që forcimi i lekut ndaj euros është rezultat i fuqizimit të ekonomisë dhe rritjes së prurjeve të turizmit.
Ky është interpretimi jonë.
Shiko, është një gjë kjo që mund ta dyshojmë ne, që Banka e Shqipërisë… por është shumë e vështirë që një prokurori nesër të provojë që Banka e Shqipërisë ka fshehur pastrimin e parave.
Shiko, unë jam i këtij mendimi, që Banka Qendrore dhe guvernatori, jo vetëm ky guvernator, por edhe ata që kanë qenë para tij, kanë qenë vasalë të qeverisë në një mënyrë apo në një tjetër. Kanë qenë të bindur. Nuk kemi parë ne ndonjë përplasje në kaq vite të guvernatorit të bankës me qeverinë, me kryeministrin. Siç ndodhin përplasje mes guvernatorit dhe qeverive në shumë vende demokratike. Trumpi është përplasur pothuajse me të gjithë guvernatorët e vet. Në Europë ashtu…
Sepse janë dy institucione të cilat kanë pozicione të ndryshme dhe mbrojnë interesa të ndryshme. Banka Qendrore është e interesuar të mbrojë stabilitetin e çmimeve dhe stabilitetin financiar. Qeveria do më shumë para në qarkullim… Pra, thënë këtë, unë sërish e kam shumë të vështirë ta besoj që Edi Rama investohet në një ligj, të bëjë një kod për të mbrojtur guvernatorin.’, u shpreh Klodian Tomorri në SYRI TV.
