Në ditën e 17-të të protestës kundër qeverisë, të rinjtë, studentët dhe qytetarët janë mbledhur para Kryeministrisë, duke vijuar thirrjet për dorëheqjen e Edi Ramës dhe kabinetit të tij qeveritar.
Sipas gazetarit të SYRI TV, Albi Rakipi, protesta nisi pranë Parlamentit, vijoi te Ministria e Arsimit dhe Sportit dhe më pas protestuesit marshuan drejt Bulevardit “Dëshmorët e Kombit”, për t’u grumbulluar përpara godinës së Kryeministrisë.
Tubimi është zhvilluar i qetë, pa incidente të raportuara mes protestuesve. Të rinjtë shprehen të vendosur për të vijuar qëndresën deri në përmbushjen e kërkesës së tyre për largimin e kryeministrit.
Ndërkohë, gjatë ditës janë raportuar edhe ndalime të disa të rinjve nga efektivë të policisë civilë. Sipas pamjeve të mbërritura në redaksinë e SYRI-t, disa adoleshentë janë ndaluar për t’u shoqëruar nga policia. Burimi pretendon se shoqërimet janë kryer pa shkak apo provokim nga ana e të rinjve.
Vëmendja tashmë është përqendruar te dita e shtunë, kur është paralajmëruar një protestë kombëtare në Tiranë. Organizatorët u kanë bërë thirrje qytetarëve nga të gjitha qytetet, si dhe shqiptarëve në diasporë, që t’i bashkohen tubimit në kryeqytet.
Studentët dhe të rinjtë vijojnë të kërkojnë dorëheqjen e Edi Ramës, ndërsa marshimet dhe protestat në rrugët e Tiranës janë shndërruar në një lëvizje të vazhdueshme kundër qeverisë.
