34 ditë pas shpërthimit tragjik në zonën e Plakës në Athinë, ku humbën jetën gjashtë persona, mes tyre tre shtetas shqiptarë, autoritetet greke kanë zbardhur rrethanat e ngjarjes. Sipas hetimeve, shpërthimi ishte pasojë e një akti të dyshuar sabotimi në tubacionet e sistemit të gazit natyror, me qëllim vjedhjen e tubave të bakrit.
Autoritetet kanë identifikuar tre persona, dy shtetas grekë dhe një shqiptar, ndaj të cilëve janë lëshuar urdhër-arreste nga organet gjyqësore kompetente në Athinë.
Shpërthimi ndodhi më 25 shtator 2026, rreth orës 07:30 të mëngjesit, në një ndërtesë në rrugën “Lysikratous”. Për pasojë, ndërtesa u shemb dhe gjashtë persona humbën jetën: një çift të moshuarish grekë, motër e vëlla nga Shqipëria, Florian dhe Florida Hoxha, si dhe Eris Cani. Në tragjedi humbi jetën edhe Ian Alexander Kirkpatrick, i cili ndodhej në Athinë për pushime dhe kishte prenotuar apartamentin përmes platformës Airbnb.
Sipas autoriteteve greke, tre personat e identifikuar dyshohet se kanë ndërhyrë në tubacionet e sistemit të gazit natyror, duke shkaktuar aktin e sabotimit që çoi në shpërthimin vdekjeprurës.
Hetimi u zhvillua nën mbikëqyrjen e autoriteteve gjyqësore dhe u krye nga Drejtoria për Trajtimin e Krimeve të Zjarrvënies pranë Shërbimit Zjarrfikës. Autoritetet bëjnë të ditur se puna hetimore nisi menjëherë pas shpërthimit dhe vijoi për 34 ditë në kushte të rrepta konfidencialiteti.
Një rol të rëndësishëm në zbardhjen e ngjarjes pati rindërtimi i vendit të shpërthimit, për të përcaktuar pozicionin dhe lidhjen mes provave të gjetura, si dhe për të rikrijuar kronologjinë e ngjarjeve.
Hetuesit analizuan gjithashtu materiale audiovizive, prova të siguruara pas heqjes së konfidencialitetit të komunikimeve dhe të dhënat e mbledhura në vendngjarje. Sipas autoriteteve greke, ndërthurja e këtyre provave me ekzaminimet shkencore mundësoi identifikimin e tre personave të dyshuar për përfshirjen në shpërthim.
