Ministrja e Drejtësisë, Donika Gërvalla, dhe ministri i Punëve të Brendshme, Xhelal Sveçla, do të dalin sot në një konferencë të përbashkët për media për të folur rreth vrasjes së Arlinda Zekajt në Vitomiricë të Pejës.
Takimi me gazetarët është caktuar për orën 09:00 dhe do të mbahet në Zyrën e Kryeministrit të Kosovës. Në të njëjtën kohë, para ndërtesës së Qeverisë pritet të mblidhen protestues që kundërshtojnë vrasjen e grave, transmeton “Bota sot”.
Të lidhura
None found
Konferenca do t’i kushtohet raporteve të përgatitura për këtë rast dhe hapave që institucionet do të ndërmarrin më tej, ka bërë të ditur Qeveria.
Një ditë më herët, Zyra e Kryeministrit njoftoi se kishte marrë raportet e detajuara nga Ministria e Drejtësisë dhe Ministria e Punëve të Brendshme lidhur me rastin e Zekajt.
Dokumentet pritet të analizohen me kujdes për të përcaktuar nëse ka pasur lëshime, neglizhencë, mungesë reagimi apo përgjegjësi institucionale gjatë trajtimit të rastit.
“Së bashku me ministrat përkatës do të bëhet shqyrtimi dhe analizimi i tyre në detaje, për historinë dhe rrjedhën e rastit, për secilin lëshim e trajtim të papërgjegjshëm, për neglizhencë e mosreagim, si dhe gjithçka që lidhet me procedurën dhe përgjegjësinë institucionale”, thuhet në njoftimin e Zyrës së Kryeministrit.
Protesta e paralajmëruar vjen pas reagimit të gjerë publik që shkaktoi vrasja e Arlinda Zekajt dhe kërkesave që institucionet përgjegjëse të japin llogari.
Gjatë ditëve të fundit janë mbajtur protesta, ku është kërkuar verifikimi i veprimeve dhe mosveprimeve të zyrtarëve të përfshirë në trajtimin e rastit të viktimës.
