Nën presionin e Trump, Ukraina ndalon përkohësisht sulmet ndaj rafinerive ruse

Sipas raportimeve të “The Wall Street Journal”, vendimi është marrë rreth mesit të tetorit dhe mund të mbetet në fuqi deri në përfundim të zgjedhjeve afatmesme në SHBA, të planifikuara për 3 nëntor.

Megjithatë, në orët e para të së premtes janë raportuar sulme të reja ndaj rafinerisë së naftës në Novokuibyshevsk, në territorin rus, ku shpërtheu një zjarr. Presidenti ukrainas, Volodymyr Zelensky, nuk ka konfirmuar zyrtarisht pezullimin e sulmeve, por ka lënë të kuptohet se ushtria ukrainase ka adoptuar një qasje më të kujdesshme.

Sipas raportimeve, më 20 tetor, gjatë takimit në Oslo me Zelenskyn, Jared Kushner, dhëndri dhe i dërguari i Donald Trumpit, i ka kërkuar presidentit ukrainas të ndalojë të gjitha sulmet për 30 ditë, si shenjë mirënjohjeje për përpjekjet diplomatike të SHBA-së.

Burime amerikane kanë bërë të ditur se bisedimet kanë qenë të tensionuara. Trump më herët kishte deklaruar se marrëveshja për naftën dizel mes SHBA-së dhe Rusisë ishte arritur pasi Zelensky kishte shpërfillur kërkesat amerikane për ndalimin e sulmeve ndaj rafinerive ruse.

Edhe disa aleatë evropianë të Ukrainës thuhet se i kanë këshilluar Kievit të marrë parasysh ndikimin politik të çmimeve të energjisë në SHBA, në prag të zgjedhjeve të mesmandatit. Sulmi i fundit i raportuar ndaj një infrastrukture ruse të naftës, përpara incidentit të së premtes, ishte regjistruar më 20 tetor, kur u godit një stacion pompimi i tubacionit Druzhba, në rajonin e Tambovit.

Ndërkohë, sulmi ndaj rafinerisë në Novokuibyshevsk ka shkaktuar zjarr, sipas raportimeve të mediave. Ngjarja vjen pas një periudhe prej më shumë se dy javësh pa sulme të raportuara ndaj rafinerive ruse.

Ndërkohë, sulmet ruse ndaj territorit ukrainas vijojnë. Sipas RBC-Ukraine, një sulm me raketa balistike ndaj Kievit, gjatë mbrëmjes së së enjtes, ka shkaktuar të paktën një viktimë. Nga bombardimet janë përfshirë nga zjarri disa magazina, ndërsa mbetje raketash kanë rënë në oborrin e një kompleksi banimi. Gjithashtu, është raportuar dëmtimi i një banese.

Situata mbetet e paqartë, ndërsa raportimet për pezullimin e sulmeve ukrainase ndaj rafinerive ruse ende nuk janë konfirmuar zyrtarisht nga autoritetet në Kiev.

Top Channel