Hakohet gjigandi i kriptomonedhave Binance, i vjedhin 6,3 miliardë dollarë! Vjedhja më e madhe në histori

Binance, platforma më e madhe e shkëmbimit të kriptomonedhave në botë, thotë se është goditur nga një sulm kibernetik, përmes të cilit janë vjedhur 6.3 miliardë dollarë (4.7 miliardë paund).

Ja çfarë dihet deri tani

Gjiganti i kriptomonedhave thotë se rreth gjysma e aseteve janë ngrirë, por një pjesë e madhe e tyre vijon të jetë në duart e hakerëve.

Dy kompani të specializuara në analizën e të dhënave kanë lidhur sulmin me një njësi hakerësh nga Koreja e Veriut, megjithëse deri më tani askush nuk ka marrë përgjegjësinë për të.

Kompania TRM Labs, e specializuar në inteligjencën e blockchain-it, thotë se disa elemente të sulmit ndaj Binance ngjajnë me sulme të mëparshme të lidhura me Korenë e Veriut, përfshirë edhe sulmin e vitit të kaluar ndaj platformës Bybit, ku u vodhën 1.5 miliardë dollarë.

Kompania thekson gjithashtu se ky sulm mund të jetë më i madhi në histori.

Richard Teng, bashkëdrejtuesi ekzekutiv i Binance, në një deklaratë në platformën X tha se hetimet paraprake të kompanisë sugjerojnë se incidenti i sigurisë mund të ketë nisur nga komprometimi i laptopit të një inxhinieri të DevOps.

Megjithatë, ai thekson: "Për të qenë të qartë, sulmuesi nuk shfrytëzoi thjesht lejet e një inxhinieri dhe ky nuk ishte një veprim i vetëm, i kryer me një klikim. Sulmi përfshiu një proces shumë më kompleks."

Binance nuk iu përgjigj drejtpërdrejt pyetjeve në lidhje me lidhjet e mundshme të sulmit me Korenë e Veriut, por deklaroi: "Ne po bashkëpunojmë ngushtë me partnerët tanë të zbatimit të ligjit për të konfirmuar identitetin e këtyre kriminelëve dhe për t'i vënë ata përpara drejtësisë", shkruan BBC.