Një nga mashtrimet më të pabesueshme në histori ndodhi në Paris në vitin 1925, kur një burrë arriti të shiste Kullën Eiffel, megjithëse nuk kishte asnjë të drejtë mbi monumentin më të famshëm të kryeqytetit francez. Personazhi pas kësaj skeme ishte Victor Lustig, një mashtrues që prezantohej si kont dhe njihej për aftësinë e tij për të fituar besimin e njerëzve të pasur. Ideja i lindi pasi lexoi në një gazetë për kostot e larta të mirëmbajtjes së Kullës Eiffel. Në atë periudhë, monumenti ishte vetëm 36-vjeçar dhe ende nuk gëzonte statusin simbolik që ka sot. Lustig falsifikoi dokumente qeveritare dhe u prezantua si zyrtar i lartë francez.
Më pas ftoi disa tregtarë të mëdhenj të skrapit në hotelin luksoz Crillon, ku u njoftoi se autoritetet kishin vendosur ta çmontonin kullën dhe ta shisnin për hekur. Ai këmbënguli që gjithçka të mbahej sekret për të shmangur një skandal publik. Një prej biznesmenëve, André Poisson, ra në kurth. I bindur se po siguronte marrëveshjen e jetës, ai pagoi shumën e kërkuar dhe madje një ryshfet shtesë për të garantuar kontratën.
Lustig mori paratë dhe u arratis në Austri. Kur Poisson kuptoi mashtrimin, turpi e pengoi të denonconte ngjarjen në polici. Por historia nuk përfundoi aty. Duke parë se askush nuk e kishte denoncuar, Lustig u kthye në Paris dhe tentoi ta shiste përsëri Kullën Eiffel. Këtë herë një prej biznesmenëve njoftoi autoritetet, duke e detyruar mashtruesin të largohej nga Franca.
Lustig vazhdoi veprimtarinë kriminale në Shtetet e Bashkuara, ku u arrestua në vitin 1935 për falsifikim parash. Ai vdiq në vitin 1947, gjatë vuajtjes së dënimit. Një shekull më vonë, historia e tij mbetet ndër rastet më të jashtëzakonshme të mashtrimit, duke dëshmuar se si dokumentet e falsifikuara, një identitet i rremë dhe një premtim fitimi mundën të bindnin një biznesmen se kishte blerë një nga monumentet më të njohura të botës.
