Katër persona të një familjeje u plagosën rëndë gjatë një sulmi në banesën e tyre, në një prej zonave më të pasura të Torontos, në Kanada.
Rreth orës 03:45 të mëngjesit të së dielës, tre persona të maskuar hynë me forcë në vilën e David Mortonit, drejtor ekzekutiv i kompanisë Mac Group. Ai dhe familjarët ndodheshin në shtëpi në momentin e sulmit.
Të lidhura
None found
Banesa ndodhet në Hyde Park Circle, një komunitet i rrethuar me siguri, në një lagje elitare ku pronat kushtojnë miliona dollarë. Sipas policisë, dy nga të dyshuarit kishin pistoleta, ndërsa i treti ishte i pajisur me çekiç.
Morton dhe dy vajzat e tij të rritura, Maggie dhe Cristina Zohil-Morton, u plagosën nga të shtënat. Bashkëshortja e tij, Doriana Zohil, u godit me çekiç.
Të katër anëtarët e familjes u dërguan me urgjencë në spital. Inspektorja e policisë së Torontos, Kristy Smith, tha se dy prej tyre kanë pësuar lëndime me pasoja të përhershme, ndërsa dy të tjerët kanë plagë të rënda, por jo kërcënuese për jetën. Autoritetet nuk kanë treguar se cilët familjarë kanë marrë dëmtimet më serioze.
Policia tha se autorët kërkuan sende me vlerë në shtëpi, para se të niste një përleshje brenda saj. Gjatë konfliktit, ata qëlluan disa herë me armë zjarri.
Një burim i cituar nga “Toronto Sun” bëri të ditur se familjarët u përpoqën t’u kundërviheshin sulmuesve dhe u qëlluan gjatë përleshjes. Sipas burimit, Morton dhe njëra nga vajzat u plagosën në këmbë, ndërsa vajza tjetër në krah. Media raportoi se të katër personat u goditën gjithashtu në kokë me çekiç.
Pas ngjarjes, të dyshuarit u larguan me një automjet SUV. Policia ende nuk ka publikuar një përshkrim të hollësishëm të tyre. Kamerat e sigurisë të vendosura në banesë kanë regjistruar pamje, të cilat tashmë u janë dorëzuar hetuesve.
Sipas inspektores Smith, deri në këtë fazë nuk ka prova se familja ose banesa e saj janë përzgjedhur qëllimisht si objektiv. Hetuesit po punojnë për të përcaktuar motivin dhe po verifikojnë nëse autorët kishin vëzhguar më parë shtëpi të tjera në zonë.
“Qytetarët duhet të ndihen të sigurt në shtëpitë e tyre”, tha Smith, duke u zotuar se policia do të bëjë gjithçka për të identifikuar dhe arrestuar përgjegjësit.
Inspektorja shtoi se së fundmi është vërejtur shtim i grabitjeve të dhunshme në banesa në lagjet e pasura të Torontos. Ajo vuri në dukje se, ndonëse vjedhjet e automjeteve me dhunë në rrugë janë pakësuar, janë shtuar rastet e hyrjes me forcë në shtëpi, ku synohen kryesisht makinat.
