Papa Leone XIV pritet të marrë pjesë në zgjedhjet afatmesme në Shtetet e Bashkuara të Amerikës, duke shënuar një moment historik për Kishën Katolike. Kreu i Vatikanit ka kërkuar një fletë votimi me postë për të ushtruar të drejtën e votës në zgjedhjet e së martës.
71-vjeçari, i lindur me emrin Robert Francis Prevost në Çikago, është regjistruar si votues në shtetin e Illinois dhe ka paraqitur kërkesën për të votuar me postë më 3 tetor.
Lajmi është konfirmuar nga Kim Fladhammer, shefi i stafit të zyrës së sekretarit të qarkut Will, i cili deklaroi për gazetën “Chicago Sun-Times” se Robert Francis Prevost figuron në listën e personave që kanë kërkuar fletë votimi për zgjedhjet e ardhshme.
Sipas autoriteteve, Papa është i regjistruar në adresën e vëllait të tij, në New Lenox, një zonë në jugperëndim të Çikagos. Megjithatë, deri në momentin e raportimit, ai ende nuk e kishte hedhur votën.
Nëse Papa Leone merr pjesë në këto zgjedhje, kjo do të përbëjë një precedent të paprecedentë, pasi do të ishte hera e parë në historinë 2 000-vjeçare të Kishës Katolike që një Papë në detyrë voton në zgjedhjet e një shteti laik.