Athina ka përshkallëzuar sërish tonet ndaj marrëveshjes detare midis Turqisë dhe Libisë, duke e konsideruar atë një shkelje të së drejtës ndërkombëtare dhe një tentativë për të rishkruar rregullat që qeverisin detet. Kryeministri grek Kyriakos Mitsotakis paraqiti para anëtarëve të Këshillit të Sigurimit të OKB-së një hartë që, sipas tij, tregon se vija e përcaktuar mes Turqisë dhe Libisë sillet sikur ishujt grekë, përfshirë Kretën, Rodosin, Karpathosin dhe Kason, të mos ekzistonin fare. Ai e përshkroi kufirin e propozuar si “diagonal” dhe pa precedent, duke theksuar se Turqia dhe Libia nuk kanë brigje përballë ose ngjitur që të justifikojnë një përcaktim të tillë dhe duke cilësuar memorandumin si “të paligjshëm”, “arbitrar” dhe sfidues të gjeografisë.
Athina shprehu që marrëveshja, e nënshkruar fillimisht në 2019 dhe së fundmi miratuar nga parlamenti në Libinë lindore, nuk mund të prodhojë pasoja mbi të drejtat sovrane të Greqisë. Në përgjigje, Ankaraja kundërshtoi interpretimin grek: presidenti turk Recep Tayyip Erdogan deklaroi se reagimet kundër marrëveshjes nuk kanë bazë legjitime dhe nënvizoi vendosmërinë e Turqisë për të neutralizuar përpjekjet që synojnë pengimin e objektivave të saj. Përfaqësuesi turk në Këshillin e Sigurimit theksoi se një hartë mund të paraqesë pretendimet e një shteti, por nuk vendos se kush ka të drejtë.
Në mbështetje të qëndrimit të Greqisë ndaj marrëveshjes shprehën kundërshtime edhe Egjipti, Bahreini dhe Emiratet e Bashkuara Arabe. Një tjetër temë që Mitsotakis vuri në qendër të debatit në Këshillin e Sigurimit ishte siguria e lundrimit tregtar, duke përmendur rastin e një anijeje tregtare në pronësi të një kompanie greke, e cila u godit nga dronë dhe u fundos në Detin e Zi pranë brigjeve të Bullgarisë. Top Channel.