Këngëtarja shqiptare me famë ndërkombëtare, Dua Lipa, ka fituar një çështje ligjore kundër një tregtari nga Hong Kongu, i cili përdorte emrin e saj për të shitur produkte pa autorizim. Organizata Botërore e Pronësisë Intelektuale (WIPO) ka vendosur në favor të artistes, duke urdhëruar transferimin e domenit të internetit te kompania e saj.
Sipas Daily Mail, tregtari, i identifikuar si Gary, kishte krijuar faqen dualipa-asiastore.com, përmes së cilës tregtonte veshje, çanta prej pëlhure dhe aksesorë për kokën, duke shfrytëzuar emrin e këngëtares pa miratimin e saj.
Pas shqyrtimit të çështjes, WIPO konstatoi se domeni ishte regjistruar dhe përdorur në keqbesim. Për këtë arsye, organizata urdhëroi kalimin e tij në pronësi të kompanisë së Dua Lipës.
Vendimi përbën një fitore për artisten në mbrojtjen e markës dhe të drejtave të saj të pronësisë intelektuale, ndërsa nxjerr në pah edhe rrezikun e përdorimit të emrave të personazheve të njohura për qëllime tregtare pa autorizimin e tyre.
Pavarësisht pasurisë së saj të vlerësuar në rreth 150 milionë paund, Dua Lipa vijon të mbrojë emrin dhe identitetin e saj tregtar, duke ndërmarrë hapa ligjorë kundër përdorimeve të paautorizuara në internet.