Shtatë efektivë policie janë pezulluar nga detyra dhe po hetohen për veprimet e tyre gjatë protestave të fundit në Tiranë. Lajmi është bërë i ditur nga ministri i Brendshëm, Ervin Demo, i cili ka paraqitur edhe bilancin e personave të lënduar.
Në një konferencë për shtyp së bashku me drejtorin e Përgjithshëm të Policisë së Shtetit, Skënder Hita, ministri deklaroi se janë regjistruar gjithsej 347 të lënduar, mes të cilëve rreth 200 punonjës policie, 107 protestues dhe 39 kalimtarë, përfshirë edhe gazetarë.
Ministri theksoi se Policia e Shtetit ka detyrimin të garantojë protestën paqësore, ndërsa ndërhyrjet ndaj akteve të dhunshme duhet të jenë proporcionale.
Ai njoftoi se Agjencia e Mbikëqyrjes Policore po shqyrton edhe dhjetëra raste të tjera të referuara nga qytetarët, në bashkëpunim me Prokurorinë.
“Javët e fundit kanë qenë shumë sfiduese për Policinë e Shtetit dhe kanë prodhuar një bilanc negativ sa i përket të lënduarve. Në total janë 347 persona të lënduar dhe nuk dua të bëj dallim mes punonjësve të Policisë së Shtetit, protestuesve apo kalimtarëve. Megjithatë, këto shifra tregojnë se niveli i dhunës ka qenë si asnjëherë më parë.
“Qëndrimi i Ministrisë së Brendshme është i qartë: ne garantojmë të drejtën kushtetuese për protestë, por edhe ndërhyrjen proporcionale të Policisë së Shtetit. Në rastet kur ka dyshime për tejkalim të kompetencave apo të përdorimit të forcës, janë marrë masat e nevojshme”, tha ai.
Ndërkohë gjatë deklaratës së tij, Hita se Janë identifikuar 52 persona të dyshuar për përfshirje në veprime të dhunshme në protesta.
Gjatë komunikimit të tij, Hita iu drejtua edhe prindërve, duke u kërkuar të tregojnë kujdes dhe të mos lejojnë përfshirjen e fëmijëve të mitur në protesta ku mund të ushtrohet dhunë. Ai u bëri thirrje gjithashtu qytetarëve të shmangin çdo akt dhune dhe të distancohen nga personat që përfshihen në veprime të tilla.
“Dhuna nuk justifikohet dhe as do të mbrohet në emër të kësaj të drejte”, u shpreh Hita.
Në fund, ai iu drejtua edhe përfaqësuesve të medias, duke vlerësuar rolin e gazetarëve, operatorëve dhe fotoreporterëve gjatë protestave.
“Strukturat e Hetimit të Krimeve kanë intensifikuar punën për identifikimin e personave që kanë ushtruar dhunë. Janë identifikuar 52 persona të dyshuar për përfshirje në veprime të dhunshme, pavarësisht se janë munduar të fshehin identitetin. Materialet i kanë kaluar Prokurorisë. Vijon puna për identifikimin e tyre dhe të çdo veprimi të dhunshëm gjatë javëve të fundit, që kanë vënë në rrezik jetën e policisë dhe qytetarëve.” – tha ai.
