Meta Platforms, kompania mëmë e Instagram dhe Facebook, arriti një marrëveshje jashtëgjyqësore me një 18-vjeçare, e identifikuar me inicialet KDB, e cila kishte paditur kompaninë duke pretenduar se platformat nxitin varësinë dhe i kanë shkaktuar probleme të shëndetit mendor dhe çrregullime të të ngrënit. Kushtet e marrëveshjes nuk janë bërë publike. Kjo është marrëveshja e dytë që Meta kryen brenda një jave, pas zgjidhjes së çështjes me një paditëse tjetër 16-vjeçare, SJ. Për pasojë, gjyqi që pritet të nisë së shpejti në Los Angeles do të vazhdojë vetëm kundër Snap Inc., kompania mëmë e Snapchat.
Avokatja e 18-vjeçares, Emily Jeffcott, tha se mbeten të përkushtuar për rritjen e sigurisë së fëmijëve në platformat sociale dhe për të mbajtur kompanitë e teknologjisë përgjegjëse për ndikimin te të rinjtë. Sipas padisë, SJ dhe KDB thanë se kishin nisur përdorimin e YouTube që në moshën trevjeçare dhe rreth moshës nëntë vjeç kishin filluar të përdorin edhe platforma të tjera sociale. Ata pretendojnë se veçori si luajtja automatike e videove dhe lëvizja e pafundme në ekran kanë nxitur zakone kompulsive dhe varësi nga përdorimi i aplikacioneve.
Kompanitë e përfshira kanë mohuar akuzat, duke deklaruar se platformat nuk janë projektuar për të krijuar varësi te të rinjtë dhe se kanë ndërmarrë masa për të garantuar një mjedis më të sigurt për përdoruesit e mitur. Çështja është pjesë e një serie padish të ngritura në SHBA ndaj kompanive të mëdha teknologjike. Në mars, një juri shpalli Metën dhe YouTube përgjegjëse për neglizhencë dhe vendosi një dëmshpërblim prej 6 milionë dollarësh në favor të një gruaje të re. Ndërkohë, TikTok dhe YouTube kishin arritur më parë marrëveshje me dy adoleshentet që ngritën padinë në Los Angeles, dhe një distrikt shkollor gjithashtu arriti marrëveshje jashtëgjyqësore përpara nisjes së procesit.
Në gusht, Meta arriti një marrëveshje prej 18 miliardë dollarësh me pothuajse të gjitha shtetet dhe territoret amerikane për t’i dhënë fund padive lidhur me dëmtimin e të rinjve, dhe u angazhua të ndryshonte disa funksione të Instagram dhe Facebook për adoleshentët. Në fillim të këtij muaji, një gjykatës në New Mexico urdhëroi Metën të paguante 25 miliardë dollarë në një çështje që lidhej me akuzat për mashtrimin e përdoruesve lidhur me trajtimin e gjuhës së urrejtjes dhe të dhënave personale në Facebook.