Gazetarja e Euronews Albania, Alice Taylor, ka denoncuar se ka marrë kërcënime me vdekje përmes rrjeteve sociale nga persona të paidentifikuar. Pikërisht për këtë fakt të rëndë ka reaguar me urgjencë Unioni i Gazetarëve Shqiptarë duke shprehur solidaritet të plotë me gazetaren dhe u ka kërkuar autoriteteve të marrin masa të menjëhershme për garantimin e sigurisë së saj.
Në reagimin e publikuar sot, UGSH kërkon zbardhjen e rastit dhe identifikimin e personave përgjegjës për kërcënimet. Unioni u bën thirrje Policisë dhe Prokurorisë që të hetojnë me seriozitet denoncimet e gazetarëve dhe të informojnë mbi ecurinë e hetimeve dhe rezultatet e tyre.
Sipas Unionit, kërcënimet dhe sulmet përmes rrjeteve sociale, shpesh nga profile anonime, janë një fenomen që prek vazhdimisht gazetarët në Shqipëri. Në këtë kontekst, organizata vlerëson se institucionet duhet të garantojnë mbrojtjen e gazetarëve dhe të mos lejojnë që kërcënime të tilla të mbeten pa përgjigje ligjore.
“UGSH reagon në solidaritet të plotë ndaj denoncimit të koleges Alice Taylor, për kërcënim me vrasje, përmes rrjeteve sociale
Unioni i Gazetarëve Shqiptarë është vënë në dijeni dhe është njohur me denoncimin publik dhe më pas, siç pretendohet nga gazetarja e EuroneWs Albania, Alice Taylor edhe atë ligjor, për kërcënim me vrasje nga persona të paidentifikuar, përmes rrjeteve sociale.
Agresorët dhe kërcënuesit, përmes komenteve në faqe personale të gazetares, kanë konsumuar kërcënim ekstrem ndaj saj.
UGSH reagon në solidaritet të plotë dhe kërkon nga autoritetet ligjzbatuese të venë në dispozicion të sigurisë së koleges të gjitha garancitë dhe mbrojtjen.
UGSH, sikundër ka tërhequr vëmendjen vijueshmërisht për kësi kërcënuesish dhe agresorësh virtualë, (shpesh anonimë dhe pa identifikim real), kërkon që për të gjitha rastet e denoncuara formalisht dhe kallzimet e kryera nga kolegët pranë institucioneve të policisë së shtetit apo prokurorive, të reagojnë dhe raportojnë për proceset e hetimit dhe rezultatet për çdo rast.
UGSH shpreh bindjen se kërcënime të tilla janë pjesë e mendjeve të sëmura, të fanatikëve politikë dhe shpesh të individëve që mbartin papërgjegjshmërinë e keqpërdorimit të asetit komunikues të rrjeteve sociale, në hapësirën publike..
UGSH kërkon urgjent, zbardhjen e rastit në fjalë, hetimin dhe vënien para përgjegjësisë ligjore të autorit apo bashkëautorëve në këtë kërcënim, (aq më tepër që kemi të bëjmë me një kolege të huaj rezidente në Tiranë), e cila mbart kulturë dhe ndërgjegje formale specifike, në raport me agresionet dhe kërcënimet verbale, të cilat janë një fenomen i përditshëm dhe i pashtershëm ndaj gazetarëve në përgjithësi në shoqërinë shqiptare.
Hetimi dhe zbardhja e rastit të koleges Taylor, është detyrim dhe meriton të trajtohet me gjithë seriozitetin institucional.
