Më shumë se dy javë protesta intensive në zemër të Shqipërisë. Mijëra studentë dhe qytetarë të zhgënjyer nga arroganca dhe premtimet e pambajtura të kryeministrit Rama, mbushën rrugët e Tiranës dhe qëndrën e saj, duke u përballur çdo ditë me një agresion policor të pa shembullt. Gjatë ditës, thirrjeve për liri dhe një jetë më të mirë, të bërtiturave, gurëve, molotovëve, kapsollave, fishekzjarreve, policia iu përgjigj dhëmbë për dhëmbë me ujë me presion e kimikate, gaz lotsjellës, spraj me piper, plumba gome e metalikë, përplasje fizike e thyerje këmbësh, ndërsa natën mbizotëronte terrori, presioni dhe arrestimet e dhunshme, e ditën tjetër pa kënduar gjeli, si të mos kishte ndodhur asgjë, z.Rama niste aktrimin para shkallëve të tij duke kërkuar dialog. Diçka që nuk u pranua asnjëherë nga studentët dhe kjo gjë detyroi kryeministrin të dalë në konferencë e t’ju kujtojë atyre mbështetjen që u vjen nga Pakti për Universitetin i bërë në vitin 2018.

“60% ose 6/10 studentë, sot, falë atij pakti, përfitojnë të paktën një formë mbështetje të drejtpërdrejt nga shteti. Në Tiranë, tarifat që paguajnë studentët për konviktet, mbulojnë më pak se 1/3 e kostos vjetore”, tha Rama.

Por cilat kanë qenë premtimet e qeverisë asokohe, pasi kanë kaluar 8 vite e duhet të bëjmë një retrospektivë.

“Së pari kemi studentët me familje me ndihmë ekonomike, të verbërit, paraplegjikë, tetraplegjikë, që marrin financimin e plotë 100% të tarifës dhe po ashtu studentë me familje me ndihmë ekonomike, të verbër, paraplegjikë dhe tetraplegjikë, që do të përfitojnë një bursë studimi prej 10 mijë lekësh të reja. Së dyti, studentët me notë mesatare mbi 9, në çdo program studimi do të përfitojnë financimin nga qeveria 100% të tarifës së tyre të regjistrimit dhe po ashtu në çdo program studimi, ata do të përfitojnë një bursë prej 10 mijë lekësh të reja. Së treti do t’i japim një mundësi të barabartë të gjithë studentëve duke paguar 50% të tarifës së studimit drejtpërdrejt nga buxheti”, pati deklaruar Rama në 2018.

“Disa prej studentëve i kanë marrë këto bursa dhe këto ndihma, por është një proces burokratik shumë i ngatërruar dhe është pjesërisht e plotësuar, nuk mund të themi që të gjithë studentët e kanë marrë premtimin e qeverisë”, shtoi studenti Angjelo Tila.

“Ana tjetër e kërkesës lidhet me konviktet. Me aktin normativ të buxhetit janë 3 milionë dollarë shtesë për investimet në infrastrukturën e konvikteve dhe ç’ka është pak, por e sigurtë, brenda këtij mandati të gjithë konviktet e Republikës së Shqipërisë do jenë të rindërtuara”, pati premtuar kryeministri.

“Unë nuk mund të flas për gjithë Shqipërinë, por nëse flas për Tiranën, pjesa më e madhe e konvikteve janë në gjendje të rrënuar. Ka pjesërisht mungesë të mensave, kushtet janë skandaloze, ngrohja është një element i rëndësishëm sidomos gjatë dimrit, nuk mund të funksionosh normalisht nëse nuk ke një ngrohje stabël. Nëse flasim për ujë dhe drita atëherë e dinë të gjithë që janë më orar. Gjendjet e kuzhinave, të dusheve, janë skandaloze. Përtej faktit që ty duhet të studiosh fort, duhet të mësohesh edhe me këtë stil jetese, faktikisht nuk është as stil jetese, por stil mbijetese”, deklaroi studenti Tila.

“Mjafton të shikoni gjendjen ku është situata. Ju e shihni që konviktet po merren nga punëtorët që po vijnë nga jashtë, duke i lënë studentët shqiptarë të përballen me çmimet e shtrenjta të Tiranës”, shtoi studiuesi Muka.

“Unë jam te Universiteti Bujqësor i Tiranës. Së fundmi doli edhe skandali me motorristët e një kompanie private të cilët ishin të strehuar atje dhe kishin zënë dy godina në Rezidencat Studentore”, tha studentja Iris Kola.

E ndërkohë që shtetasit e huaj që punojnë si motorrista strehohen në godinat e studentëve, Kola tha se ka akoma rezidenca që nuk janë funksionale, nuk janë të mbaruara dhe fondet prapëseprapë nuk janë të justifikuara dhe nuk ka transparencë.

“Ndërtimet janë në mënyrë skandaloze. Muret janë tej mase të holla saqë kur tështin të thonë shëndet nga dhoma tjetër. Deri vjet nuk kishin as ujë të ngrohtë, tani më kanë thënë që e kanë azhornuar. Përveç ujit të ngrohtë që tani ka ardhur si inovacion, nuk ka as mensa”, shtoi ajo.

Një tjetër premtim i z.Rama në 2018 ishte rishimi i titujve akademikë, pra lufta ndaj plagjiaturave. Një premtim qesharak nëse vëmë në dukje se gjatë 2 muajve të fundit emisioni “Piranjat” ka transmetuar 5 episode të politikanëve shumë pranë z.Rama të cilët janë kapur me plagjiaturë, mes tyre ministrja më e re e Shëndetësisë, Klodiana Spahiu, ish-ministrja e Arsimit Evis Kushi dhe Ogerta Manastirliu, z.Taulant Balla dhe Ulsi Manja.

Një tjetër premtim ishte pajisja e studentëve me karta.

“Unë që kur kam marrë kartën time të studentit nuk e kam përdorur asnjëherë të jem realist sepse të gjithë shokët dhe shoqet e mia e kanë përdorur vetëm për atë abonenë e autobusit dhe mua nuk më është dashur ndonjëherë aboneja e autobusit”, tha për “Piranjat” studenti Angjelo Tila.

“Nga ana tjetër për blerjet e përditshme nuk ka asnjë mbështetje. Janë 2-3 dyqane specifike për libra jashtë-shkollorë, jo të shkollës, që marrin ulje dhe mund të ketë ndonjë ulje sezonale me përqindje të vogël gjë që neve nuk e kemi luksin t’i shohim pasi studenti shqiptar nuk ka kohë të mendojë për teatro dhe për muze. Ndërkohë që paradite është në shkollë dhe pasdite duhet të ndjekë punën, detyrimisht. Sepse dhe me atë 10 mijë lekëshin që marrin nuk arrijnë të mbulojnë asgjë nga shpenzimet e përditshme”, shtoi Iris Kola.

Lidhur me bibliotekën me standarte europiane apo kampusin universitar të Tiranës, studentët pohojnë se asnjëra nuk është ndërtuar ende.