Mirdita mirëpriti edicionin e 12-të të Manifestimit Letrar Trekufitar “Muzat e Alpeve”, me pjesëmarrjen e shkrimtarëve, poetëve dhe krijues nga Shqipëria, Kosova dhe Mali i Zi.

Gjatë aktivitetit u prezantua historia e pasur letrare dhe trashëgimia kulturore e Mirditës, ndërsa një vëmendje e veçantë iu kushtua veprimtarisë 11-vjeçare të Shoqatës Rajonale të Shkrimtarëve “Teuta”, e cila gjatë kësaj periudhe është shtrirë në 25 qytete.

Në këtë kuadër u promovua edhe antologjia dygjuhëshe “Muzat e Alpeve”, që përmbledh krijimtarinë e poetëve laureatë.

Përmes fjalës artistike dhe shkëmbimit të përvojave krijuese, manifestimi synon të forcojë lidhjet kulturore dhe letrare mes tre vendeve.

“Kemi nderin të jemi në vendin ku u i jepet çmimi njërës prej mbretëreshës së poezisë shqiptare, Flora Brovina. Mirdita është një vend i begatë sa i përket letërisisë”, tha shkrimtari Ndue Dedaj.

Ndërsa, organizatorja Jeta Elezaj tha se "shoqata ka ndarë 12 çmime ndër vite, ndërsa ky edicion i kushtohet Flora Brovinës për kontributin njerëzor, kombëtar dhe letrar".  

Në qendër të edicionit të këtij viti ishte figura e poetes së njohur Dr. Flora Brovina, ku në nderim të krijimtarisë së saj u promovua përmbledhja poetike “Pas frymës FJALA”, e përkthyer në gjuhën malazeze si dhe u nderua pas vdekjes me çmimin “Teuta” për Vepër Jetësore, titull i cili iu dorëzua familjarëve të saj të pranishëm në keteaktivitet.Manifestimi Letrar u organizua nga Shoqata Rajonale e Shkrimtarëve “Teuta”, me mbështetjen e Ministrisë së Kulturës, Rinisë dhe Sportit të Kosovës, Bashkisë Mirditë dhe Komunës së Deçanit, duke dëshmuar edhe një herë rolin e letërsisë si urë bashkëpunimi dhe komunikimi mes trevave shqiptare dhe më gjerë.