Senatori brazilian Flavio Bolsonaro ka deklaruar se është larguar nga Brazili për të shmangur atë që e cilëson si persekutim gjyqësor, pas humbjes në zgjedhjet presidenciale. Ai bëri të ditur se ndodhet në Shtetet e Bashkuara, ku është larguar së bashku me bashkëshorten, pa njoftuar askënd për vendimin.
“Persekutimi filloi shumë më herët nga sa e imagjinoja”, u shpreh Bolsonaro në një video të publikuar në Instagram, ku foli edhe për arsyet e largimit nga vendi.
Sipas tij, të hënën, pasi kishte vizituar të atin, ish-presidentin Jair Bolsonaro, i cili ndodhet në arrest shtëpiak, policia e njoftoi se pasaportat e tij do të konfiskoheshin në kuadër të një hetimi për pastrim parash. Flavio Bolsonaro nuk dha detaje se si arriti të largohej nga Brazili.
“U largova për të mirën e Brazilit”, deklaroi ai.
Senatori, i cili refuzoi të pranonte humbjen përballë presidentit të qendrës së majtë Luiz Inácio Lula da Silva në raundin e dytë të zgjedhjeve, foli edhe një herë për pretendimet e tij për mashtrim zgjedhor. Këto pretendime janë mohuar si nga partia e tij, ashtu edhe nga gjyqësori.
Në videon e publikuar, ai i krahasoi parregullsitë e pretenduara zgjedhore me gola të shënuar me dorë, të cilët nuk u anuluan nga sistemi VAR.
Flavio Bolsonaro parashikoi gjithashtu se Brazili do të falimentojë nën drejtimin e Lulës dhe deklaroi se është i gatshëm të kandidojë sërish për president.
“Nuk po flas për vitin 2030, por më shpejt”, tha ai.