Më shumë se 160 mijë persona pritet të marrin pjesë në protestat që do të zhvillohen këtë të shtunë në mbarë Gjermaninë, sipas organizatorëve. Lëvizja e udhëhequr nga të rinjtë, e frymëzuar nga protestat në vende të tjera të Evropës, kërkon përmirësimin e sistemit arsimor dhe uljen e kostos së jetesës.
Protestat vijnë pas një vale demonstratash të organizuara nga gjenerata Z në vende të ndryshme evropiane gjatë këtij viti. Në Serbi, aktivizmi i udhëhequr nga studentët ndihmoi në largimin e udhëheqësit shumëvjeçar të vendit përmes kutive të votimit, ndërsa protestat në Francë kanë përshkallëzuar në trazira dhe plaçkitje.
Në Gjermani, protestat organizohen nga grupi i aktivistëve “Gen Z regelt” (Gjenerata Z merr situatën në dorë) dhe janë planifikuar në 34 qytete, përfshirë Berlinin, Frankfurtin dhe Munihun.
Organizatorët kundërshtojnë shërbimin e detyrueshëm ushtarak dhe kërkojnë më shumë investime në arsim, në një kohë kur shumë të rinj gjermanë po përballen me rritjen e kostos së jetesës.
Autoritetet gjermane presin që demonstratat, të cilat përkojnë me festimet e Halloween-it, të zhvillohen kryesisht në mënyrë paqësore. Megjithatë, ato kanë paralajmëruar për përpjekje të grupeve ekstremiste për ta shfrytëzuar këtë lëvizje.
Sipas Ministrisë Federale të Brendshme, në mobilizimin e mbështetjes janë përfshirë edhe pjesë të skenës ekstremiste të së majtës ekstreme në Gjermani, si dhe disa grupe të lidhura me lëvizje ekstremiste të huaja.
“Ne të gjithë i kemi në mendje pamjet nga Franca – plaçkitjet, djegiet e shtëpive, djegiet e automjeteve policore dhe sulmet ndaj zyrtarëve të policisë. Franca nuk duhet të merret si model në këtë drejtim”, deklaroi Roman Poseck, ministri i Brendshëm i landit të Hessenit, kryeqyteti i të cilit është Frankfurti.
Ndërkohë, në Berlin, disa biznese përgjatë bulevardit luksoz të blerjeve Kurfürstendamm kanë mbuluar vitrinat e tyre dhe kanë planifikuar mbylljen më të hershme, për shkak të shqetësimeve për trazira të mundshme gjatë protestave.