Bordi i Transparencës ka përcaktuar çmimet e reja të shitjes së karburanteve në vend. Duke nisur nga mesdita e kësaj të shtune, 31 tetor 2026, nafta do të tregtohet me jo më shumë se 212 lekë për litër, ndërsa benzina me 179 lekë për litër.
Sipas vendimit, çmimi maksimal i shitjes me pakicë për gazoilin e standardit SSH EN 590 është përcaktuar në 212 lekë për litër, ndërsa çmimi me shumicë do të jetë jo më shumë se 200 lekë për litër.
Për benzinën, çmimi maksimal me pakicë është caktuar në 179 lekë për litër, ndërsa ai me shumicë në 167 lekë për litër.
Çmimet e reja hyjnë në fuqi sot, më 31 tetor, në orën 12:00, dhe do të mbeten të vlefshme deri në mbledhjen e ardhshme të Bordit, kur do të shqyrtohen ndryshimet e mundshme në treg.
Bordi u ka rikujtuar operatorëve të shitjes me shumicë dhe pakicë detyrimin për zbatimin e vendimit, duke paralajmëruar se për shkeljet e konstatuara do të vendoset pezullimi i aktivitetit.
Vendimi është marrë në kuadër të masave për situatën e veçantë në tregun e hidrokarbureve, me synimin për të mbrojtur konsumatorët dhe për të garantuar konkurrencën e ndershme.
