LIVE TV- Dështon sërish protesta e Sali Berishës, studentët distancohen nga PD: Opozita jemi ne! Por, pjesëmarrja në rënie! Maskat sulme me gurë e molotovë ndaj efektivëve

Ndërhyrja e policisë me ujë, pasuar edhe nga shiu, po shpërndajnë protestuesit. Një pjesë e mirë prej tyre janë pajisur me çadra e mushama, por ata po lëvizin drejt hyrjes së “Rrugës së Durrësit.”

Disa prej tyre janë strehuar jashtë bizneseve, të cilat janë të mbyllura.

Molotovët e protestuesve po shënjestrojnë policinë, ku disa prej tyre kanë përfunduar në këmbët e efektivëve. Fatmirësisht, këto incidente kanë kaluar pa lëndime.

Protestuesit kanë nisur sulmet me molotovë te Ministria e Arsimit, ku disa prej tyre kanë përfunduar poshtë autobotit të ujë duke shkaktuar shpërthim e flakë.

Protesta para Ministrisë së Arsimit është përshkallëzuar sërish në dhunë, pasi protestuesit e maskuar kanë sulmuar me gurë e molotovë efektivët e policisë. Për t'i shpërndarë dhe për të ndalur sulmet, Policia ka ndërhyrë me ujë me presion.

Një protestues ka shfaqur kreativitet me maskimin e tij që në vend të kapuçëve të zinj apo syzeve, të përdorë maskën e një kllouni të frikshëm. Më pas, imiton edhe një të qeshur djallëzore.

Maskimi i tij i përshtatet edhe festës së Halloween-it sot.

Pas refuzimit të studentëve për të pranuar militantët dhe deputetët e PD-së në protestën para Ministrisë së Arsimit, Gazment Bardhi tha për Report Tv se demokratët nuk e kanë betejën me partitë e vogla, por me kryeministrin Edi Rama.

“10 apo 12 njerëz që kanë më shumë zë kundër opozitës sesa Ramës, le ta vijojnë strategjinë e tyre. Nuk e shpëtojnë dot Ramën. Nuk ka askush dyshime që PD është partia më e madhe e opozitës dhe nëse ne betejën do ta kishim me parti të vogla, mund të bënim luftë me ta. Ne jemi të vërtetë, luftën e kemi me Ramën dhe do të vazhdojmë luftën me Ramën”, tha Bardhi për Report Tv.

Të maskuarit kanë shkulur pllakat e trotuarit para Ministrisë së Arsimit.

Ata kanë sulmuar edhe blutë me gurë, teksa kanë qëlluar edhe drejt institucionit.

Mes sulmeve me gurë të protestuesve të maskuar ndaj policisë dhe zjarreve në koshat e mbeturinave, policia ka nisur të ndërhyjë me hedhjen e ujit. Një autobot është afruar dhe po hedh ujë për të fikur flakët në kazanët e mbeturinave.

“Polici e krimit”, dëgjohen protestuesit në kor.

Për të shmangur incidentet me protestuesit te Ministria e Arsimit, deputetët e PD janë tërhequr më në hyrje të “Rrugës së Durrësit.”

Në protestë shihet edhe Klevis Balliu që mbulon gojën me dorë ndërsa komunikon në celular.

Pas djegieve të dy koshave të mbeturinave në mes të rrugës, protestuesit kanë hedhur molotov para Ministrisë së Arsimit.

Të maskuarit gjithashtu kanë gjuajtur me gurë drejt institucionit.

Disa protestues të maskuar janë radhitur para policëve te Ministria e Arsimit dhe qëllojnë me llastiqe.

Krah tyre ka 3 kosha mbeturinash që digjen.

Refuzimi i të rinjve për të pranuar militantët dhe deputetët e PD-së në protestën para Ministrisë së Arsimit ka irrituar Flamur Nokën, i cili ia faturoi Arlind Qorit thirrjet kundër Berishës.

Pavarësisht kordonit të krijuar nga protestuesit dhe thirrjeve “Berisha në burg”, Noka këmbënguli se askush nuk mund ta largojë PD-në nga sheshi, ndërsa tha se mbështetësit e Qorit “do ta marrin përgjigjen një për një”.

“Po ruajmë gjakftohtësinë, ne kemi dalë kundër Raës, ata kanë dalë kundër opozitës. Këtu PD nuk e shkul dot askush nga sheshi, ata qoristat do ta marrin përgjigjen një për një”, tha Noka.  

Protestuesit po ndezin tymuese blu e të kuqe, si dhe po djegin kartonë e dy kosha mbeturinash në rrugën para Ministrisë së Arsimit. Gjithashtu po hedhin edhe kapsollë.

Policia po bën thirrje që të distancohen nga aktet e dhunshme. “Mos bllokoni rrugën” dhe “mos ndizni zjarre”, thotë policia.

Në gatishmëri është edhe autoboti i ujit.

Tensione janë shënuar te Ministria e Arsimit, pasi militantët e PD donin t'i bashkoheshin protestës së studentëve.

"Nëse dikush po tenton të prish këtë protestë ne i hedhim në kosh", tha protestuesja.

Një protestues ka shpjeguar për Report Tv irritimin e tij për praninë e deputetëve të PD dhe opozitës në protestën te Ministria e Arsimit, që po përpiqen t’i bindin të bëhen bashkë.

“Ne kemi 5 muaj në protestë, jemi për të njëjtin qëllim, për rrëzimin e këtij sistemi Rama-Berisha. PD ka muaj që kërkon të kapë protestën dhe ta prishë protestën”, tha protestuesi.

Deputetët demokratë Gazment Bardhi, Saimir Korreshi e Xhelal Mziu janë të pranishëm në protestën te Ministria e Arsimit, por po qëndrojnë në hyrje të “Rrugës së Durrësit.”

Protestuesit para Ministrisë së Arsimit i kanë pritur me ‘këmbët e para’ militantët e Partisë Demokratike që po përpiqen t’u bashkohen. Ata kanë krijuar një kordon për të mos i lejuar, ndërsa kanë nisur edhe thirrjet “Rama në burg, Berisha në burg” dhe “opozitë e shitur.”

Një përfaqësuese e PD u bën thirrje të bashkohen sepse përçarja i shërben Ramës, por protestuesit i thonë se ata janë bashkë. Ata i thonë se demokratët janë të mirëpritur, por jo Berisha dhe deputetët e tij kur protesta është edhe kundër opozitës.

Përfaqësuesja e PD: Po i shërbeni Ramës! Bëhuni sot bashkë!

Protestuesi: Kjo parti e ka sjellë popullin këtu!

Përfaqësuesja e PD: Sot bëhuni gjithë shqiptarët bashkë për të rrëzuar Edi Ramën!

Protestuesi: Shqiptarët janë bashkë!

Protestuesi tjetër: Çdo qytetar është i mirëpritur të vijë! Deputetët duhet të shmangen sepse janë simbol i partisë që përfaqësojnë. Ai që nuk është i mirëpritur është një person që vetë ekzistenca e tij përfaqson një parti. Çdo demokrat është i mirëpritur! Berisha dhe deputetët e tij në asnjë mënyrë! Ç’dallim ka Berisha nga Rama? Janë një! Protestë edhe kundër qeverisë, edhe kundër opozitës!

Protestuesi: I bëjmë thirrje Arlind Qorit mos të fusë përçarje!

Përfaqësuesja e PD: Hajdeni si qytetarë, jo si përfaqësues partie!

Protestuesja: Ne duam që kauzën tonë mos ta marrë asnjë parti!

Protestuesit thirrje: Jo deputetët!

Protestuesit ashtu edhe si në ditët e kaluara kanë zgjedhur të maskohen.

Një prej protestuesve ka zgjedhur të maskohet si Belinda Balluku, ndërkohë një protestues tjetër ka vendosur një maskë me fytyrën e kryeministrit Edi Rama. Së bashku me një tjetër të maskuar ata kanë pozuar para kordonit të policisë te Ministria e Arsimit. 

Më pas, protestuesit janë shtirur si kryeministri dhe deputetja duke improvizuar një dialog.

‘Rama’: Mos thoni Rama në burg, vetëm Belinda në burg!

‘Belinda’: Po ika unë, e marr me vete!

‘Rama’: Vetëm Belinda në burg! Shikoni, në nëntor e kemi parashikuar për Belindën, në dhjetor Taulant Ballën.

-Po ti kur do të ikësh?

‘Rama’: Unë e kam thënë, vetëm kur të ma ketë qejfi im do të iki!

Bashkohen dy protestat në Tiranë, por jo protestuesit. Mbështetësit e Sali Berishës marshuan nga Kryeministria në drejtim të Ministrisë së Arsimit, por të rinjtë krijuan një kordon para tyre, duke mos i lejuar të afrohen më shumë. Thirrjet “Berisha në burg” tensionuan mbështetësit demokratë.

Një grup demokratësh arritën të çajnë kordonin dhe të afrohen pranë Ministrisë së Arsimit, ndërkohë që të rinjtë vijojnë të pengojnë afrimin e mbështetësve të tjerë të PD-së. Protestuesit e rinj nuk ndalën as thirrjet “Opozitë e shitur”.

Sali Berisha mungoi në protestën e dytë kombëtare. Ai ka dërguar vetëm deputetët demokratë, të cilët pasi qëndruan para Kryeministrisë, ku në emër të PD-së mbajti një fjalim Flamur Noka, marshuan drejt Ministrisë së Arsimit për t’iu bashkuar grupit të protestuesve të tjerë, ku nuk mungojnë as ata me maska.

"Të gjithë shqiptarët kanë vetëm një mesazh dhe ne si demokratë e përcjellim sot këtu, studentët që janë atje. Ka vetëm një mesazh: Edi Rama largohu, ti nuk mund ta mbash pushtetin me dhunë. Askush nuk të do më, askush nuk të mbështet më. Me dhunë policore e kanë tentuar edhe diktatorë të tjerë dhe ti e di secili është fundi. Ndaj edhe kjo është motoja mbi bazën e të cilës është thirrur kjo protestë e dytë kombëtare e PD, për të qenë në sinkron të studentëve, për t’i mbështetur studentët. Kërkesat e tyre duhet të respektohen, zëri i tyre duhet të dëgjohet. PD ka qenë dhe është dhe do të vazhdojë t’i mbështesë kërkesat e studentëve dhe studentët në protestën e tyre. Ne u mblodhëm këtu për të filluar protestën, tashmë protesta do të vijojë tek studentët atje tek sheshi ku ata nisën betejën", tha Flamur Noka. 

Një grup protestuesish janë mbledhur këtë të shtunë para Ministrisë së Arsimit.

Ashtu si herët e kaluara një pjesë e protestuesve kanë zgjedhur të jenë të maskuar.

Njëri prej tyre ka vendosur të maskohet si Kryeministri Edi Rama.

Dy protestues të vegjël të maskuar janë ulur te vizat e bardha në rrugën te Ministria e Arsimit, ndërsa para tyre qëndrojnë efektivët.

Krah fëmijëve ndodhet edhe një protestues me veshje popullore dhe flamurin kombëtar në dorë.

Partia Demokratike thirri sot një protestë kombëtare, para Kryeministrisë.

Report Tv sjell pamjet me dron (ora 13:00) nga Bulevardi Dëshmorët e Kombit, ku shihen vetëm një grup militantësh.

Edhe pse ishte vetë që thirri protestën, kreu i PD Sali Berisha nuk është i pranishëm.

Kupola drejtuese dhe eksponentë të Partisë Demokratike janë bërë pjesë të protestës që kanë thirrur para kryeministrisë.

Mes tyre shihen Flamur Noka, Gazment Bardhi, Agron Gjekmarkaj, si dhe pjesëtarë të Partisë së Lirisë si Erisa Xhixho, Tedi Blushi. Më herët u shfaq edhe Belind Këlliçi.

Kreu i PD, Sali Berisha, ashtu si dhe të shtunën e kaluar të protestës kombëtare që thirri, mungon sot. Megjithatë, PD ka shprehur vazhdimisht mbështetje për protestën dhe më vonë pritet t’i bashkohet protestuesve të grumbulluar te Ministria e Arsimit.

Ndërsa në bulevard deputetët e Partisë Demokratike përplasen me policinë, te Ministria e Arsimit pamja është plotësisht e ndryshme.

Protestuesit deri më tani nuk kanë kryer asnjë sulm, ndërsa një polic shihet duke mbajtur për krahu një zonjë të moshuar ndërsa bisedon me të.

Deputetët Belind Këlliçi e Tedi Blushi janë përplasur me policinë në bulevard duke akuzuar se nuk lejojnë kalimin e qytetarëve. Në një moment, Blushi përpiqet të shtyjë policët, të cilët nuk e lejojnë të vazhdojë përpara.

Policia: Ikni mbrapa!

Qytetari: Hap rrugën aty se do të iki në shtëpinë time!

Policia: Kemi një urdhër.

Tedi Blushi: Ça urdhri?

-Është deputet, mos e prek me dorë! nuk ke të drejtë ta prekësh me dorë!

Edhe mes Këlliçit e policëve ka një përplasje ku deputeti edhe fyen efektivët. Këta të fundit i thonë se ka një perimetër sigurie i cili pengon lëvizjen.

Belind Këlliçi: Hiqe dorën! Plehrë!

Policia: Prit pak!

Belind Këlliçi: Për çfarë i pengon njerëzit? Ça problemi ka, pse pengohen njerëzit?

Policia: Është perimetri i sigurisë.

Qytetari: Nga kush siguroheni? Nga kush keni frikë?

Belind Këlliçi: Dua të kaloj bashkë me zotërinë që është në biçikletë, në rrugë të vet.