Pas shtatë fitoreve radhazi, Manchester City pësoi një frenim tjetër në Premier League, duke u mposhtur në shtëpi nga Brighton 1-0 dhe regjistruar disfatën e dytë radhazi. Skuadra e Enzo Maresca u mund nga një rival që mori edhe hakun për eliminimin e City nga Kupa e Ligës disa ditë më parë.
Brighton nisi ndeshjen me ritëm të lartë dhe pas vetëm 10 minutash kaloi në avantazh. Ayari shfrytëzoi një pasim të De Cuyper, ndërsa rrëshqitja e Matheus Nunes lejonte golin e hershëm të “Seagulls”. Pas këtij momenti, Manchester City filloi të dominojë posedimin e topit dhe të kërkonte barazimin, por pa arritur të shfrytëzonte mundësitë në pjesën e parë.
Në pjesën e dytë, Citizens rritën presionin në kërkim të golit të barazimit, por minutat e para të fraksionit të dytë munguan raste të pastra shënimi. Më vonë, Ndiaye pati rastin më të mirë për të barazuar, duke goditur shtyllën pas një aksioni të rrjedhshëm dhe duke humbur kështu një mundësi të madhe. Në minutën e 89, O’Reilly pati një shans të shkëlqyer për të sjellë shifrat në 1-1, por gjuajtja e tij përfundoi pak centimetra jashtë porte. Në minutat shtesë, Doku goditi traversën, por edhe kjo mundësi nuk solli ndryshim rezultati.
Ndeshja përfundoi 1-0 për Brighton, me Manchester City që nuk arriti të shënonte pavarësisht dominimit në zotërimin e topit dhe presionit në pjesën e dytë. Humbja lë ekipin e Maresca në rrezik që të parakalohet në renditje nga Arsenali, ndërsa Brighton largohet me tre pikë dhe me hakmarrjen për eliminimin nga Kupa e Ligës. Top Channel
