Deputetët e Partisë Demokratike iu bashkuan protestës së studentëve, e cila vijon për të 19-ën ditë radhazi, në mbështetje të kërkesave të tyre dhe dorëheqjes së Edi Ramës.

Deputetët u nisën nga selia e Partisë Demokratike, marshuan në drejtim të Kryeministrisë dhe më pas iu bashkuan studentëve të mbledhur para Ministrisë së Arsimit.

Gjatë protestës, Sekretari i Përgjithshëm i PD-së, Flamur Noka, deklaroi se mesazhi i opozitës dhe i qytetarëve është largimi i kryeministrit Edi Rama, duke akuzuar qeverinë se po përpiqet të mbajë pushtetin përmes dhunës policore.

‘Sot ka vetëm një mesazh: Edi Rama, largohu! Ti nuk mund ta mbash pushtetin me dhunë. Askush nuk të do më, askush nuk të mbështet më’, u shpreh Noka.

Ai theksoi se Partia Demokratike është në sinkron me protestën studentore dhe do të vijojë të mbështesë kërkesat e studentëve, të cilat sipas tij duhet të dëgjohen dhe të respektohen nga qeveria.

‘Kjo protestë është thirrur për të qenë në sinkron me studentët, për t’i mbështetur ata. Kërkesat e tyre duhet të respektohen, zëri i tyre duhet të dëgjohet’, deklaroi Noka.

Duke iu bashkuar studentëve përpara Ministrisë së Arsimit, deputetët e PD-së përcollën mesazhin e mbështetjes së opozitës për vijimin e protestës dhe kërkesave të studentëve.