Detaje të reja janë zbardhur nga hetimet për shpërthimin e fuqishëm në zonën e Plakës, në Athinë, ku humbën jetën gjashtë persona, mes tyre edhe disa shqiptarë. Autoritetet greke kanë publikuar fotografi nga këqyrja e vendngjarjes, ku dokumentohen dëmtimet në tubacionet e bakrit, të cilat dyshohet se u shkaktuan nga tre personat e arrestuar për ngjarjen.
Sipas hetimeve të Drejtorisë për Hetimin e Krimeve të Zjarrit (DAEE), tre të dyshuarit, mes tyre edhe shtetas shqiptarë, kishin hyrë në ndërtesë dhe kishin prerë me një vegël të posaçme një pjesë të tubit të bakrit pranë matësit të gazit. Qëllimi dyshohet se ishte shitja e tij për skrap dhe përfitimi i një shume të vogël parash.
Megjithatë, veprimi i tyre dyshohet se shkaktoi pasoja tragjike. Heqja e tubit dëmtoi një tubacion aktiv të gazit natyror, duke shkaktuar një rrjedhje që zgjati rreth pesë orë e gjysmë.
Gazi i grumbulluar në ndërtesë shkaktoi më pas shpërthimin e fuqishëm, që la pas gjashtë viktima dhe dëme të mëdha materiale. Në fotografitë e publikuara nga autoritetet dallohen gjurmët e prerjes në tubin e bakrit, si dhe dëmtimi i tubacionit pranë tij, i cili ishte ende në funksion.
Sipas raportit të ekspertëve, shkëputja e tubit aktiv nga pjesa metalike lidhëse shkaktoi rrjedhjen e gazit natyror që i parapriu shpërthimit. Dokumentacioni fotografik konsiderohet një element i rëndësishëm i hetimit, pasi ndihmon në rindërtimin e mekanizmit që çoi në tragjedinë me gjashtë viktima.
Tre personat e arrestuar janë 34, 37 dhe 55 vjeç. Sipas autoriteteve, ata kanë precedentë të mëparshëm penalë dhe u identifikuan pas analizimit të pamjeve të kamerave të sigurisë. Kamerat i kishin filmuar në rrugicat e zonës, rreth pesë orë përpara shpërthimit, duke mbajtur pjesën e tubit të bakrit që dyshohet se kishin hequr nga ndërtesa.
Të tre përballen me akuza të rënda, mes tyre zjarrvënie dhe shkaktim shpërthimi me pasojë vdekjen e personave, si dhe vrasje me dashje eventuale. Sipas mediave greke, ata pritet të dalin përpara hetuesit të hënën, ku do të japin shpjegimet e tyre për ngjarjen.
Hetimet paraprake sugjerojnë se një tentativë për të përfituar nga shitja e bakrit përfundoi në një tragjedi me gjashtë viktima.