Presidenti i Turqisë, Recep Tayyip Erdogan, ka paralajmëruar se sulmet ndaj anijeve civile në Detin e Zi rrezikojnë të shtojnë tensionet në rajon, duke theksuar se një përshkallëzim i tillë nuk është në interes të asnjërës palë.
Ai i bëri këto deklarata të shtunën në Stamboll, gjatë konferencës së përbashkët për shtyp me presidentin ukrainas, Volodymyr Zelenskyy, i cili po zhvillon një vizitë pune në Turqi.
Siguria në Detin e Zi dhe garantimi i lundrimit të sigurt ishin ndër çështjet kryesore të diskutimit mes dy udhëheqësve. Ata shqyrtuan përpjekjet për përmirësimin e situatës dhe mbrojtjen e transportit detar në këtë zonë strategjike.
Erdogan rikonfirmoi gatishmërinë e Turqisë për të mbështetur nismat diplomatike që synojnë përfundimin e luftës në Ukrainë.
“Ne jemi të gatshëm të bëjmë çdo përpjekje të mundshme për të hapur rrugën drejt paqes në Ukrainë”, deklaroi ai.
Presidenti turk foli edhe për rindërtimin e Ukrainës pas luftës. Sipas tij, kompanitë turke që kanë vazhduar punën në këtë vend, pavarësisht luftës së nisur më 2022, do të luajnë rol të rëndësishëm në procesin e rindërtimit.
Takimi u përqendrua gjithashtu në rëndësinë e ruajtjes së lëvizjes së lirë të anijeve civile dhe forcimit të sigurisë detare në Detin e Zi.