Përleshje u regjistruan në Hamburg dhe Frankfurt të shtunën (31 tetor), në përfundim të protestave mbarëkombëtare ku mijëra qytetarë kërkuan përmirësimin e sistemit arsimor dhe uljen e kostos së jetesës.
Dhjetëra mijëra persona në të gjithë Gjermaninë iu bashkuan demonstratave, të cilat u zhvilluan në ditën e Halloween-it dhe që gjatë pjesës më të madhe të pasdites u karakterizuan nga qetësia.
Protestat vijnë pas një vale demonstratash të udhëhequra nga brezi Z në të gjithë Evropën gjatë këtij viti. Në Serbi, aktivizmi i udhëhequr nga studentët ndihmoi në largimin e liderit që kishte qëndruar prej kohësh në pushtet përmes votës, ndërsa në Francë protestat kanë përfunduar në përleshje dhe grabitje.
Protestat në Gjermani u organizuan nga grupimi “Gen Z regelt”, që në shqip përkthehet “Brezi Z merr gjërat në dorë”. Demonstratat ishin planifikuar në 34 qytete, përfshirë Berlinin, Frankfurtin dhe Mynihun.
Grupi kundërshton shërbimin e detyrueshëm ushtarak dhe kërkon më shumë investime në arsim, në një kohë kur shumë të rinj gjermanë po përballen me rritjen e kostos së jetesës.
Të dhënat zyrtare të publikuara gjatë pasdites së së shtunës treguan se pjesëmarrja ishte më e ulët se 182 mijë personat që organizatorët kishin parashikuar fillimisht.
Policia në Frankfurt, Mynih dhe Berlin raportoi për një pjesëmarrje deri në 18 mijë protestues, rreth gjysma e shifrës prej 36 mijë personash të publikuar në faqen e organizatorëve.
