Ish-ministri i Jashtëm dhe ish-deputeti i Partisë Demokratike, Besnik Mustafaj, ka komentuar protestat e zhvilluara gjatë muajve të fundit në vend, duke u ndalur te pjesëmarrja e të rinjve, reagimi i qeverisë dhe kërkesat politike të ngritura gjatë tubimeve.
Në një intervistë në emisionin “Goca dhe Gra”, Mustafaj tha se përshkallëzimi i protestave ishte, sipas tij, i parashikueshëm, pas një periudhe të gjatë në të cilën të rinjtë protestuan pa incidente. Ai argumentoi se shpërfillja e kërkesave të tyre nga qeveria ndikoi në rritjen e tensioneve.
Sipas Mustafajt, klima që është krijuar aktualisht në vend është kundër establishmentit politik dhe një pjesë e të rinjve kërkojnë figura dhe alternativa të reja.
Duke komentuar thirrjet kundër Edi Ramës dhe Sali Berishës, ish-ministri theksoi se nuk mund të përcaktohet se sa protestues i mbështesin ato. Sipas tij, mbështetja reale politike mund të matet vetëm përmes votës.
“Problemi është se vota duhet t’i largojë. Nuk mund t’i largojë gjë tjetër, të jemi realistë”, u shpreh Mustafaj, duke shtuar se ai beson te zgjedhjet si mënyra për ndryshimin e pushtetit.
Ai tha se personalisht nuk do t’i kërkonte Edi Ramës të largohej përmes presionit politik, por do të votonte kundër tij. Megjithatë, Mustafaj deklaroi se, nëse do të ishte në pozicionin e kryeministrit, do ta çonte vendin në zgjedhje.
I pyetur se çfarë do t’i thoshte Ramës nëse do ta kishte përballë, Mustafaj u shpreh se do t’i kërkonte dorëheqjen.
“Jep dorëheqjen, trego se je burrë shteti”, deklaroi ai, duke argumentuar se dorëheqja politike në situata të tilla është pjesë e praktikës demokratike.
Mustafaj kujtoi gjithashtu përvojën e protestave studentore të vitit 2018, duke theksuar se brezi i sotëm, sipas tij, e ka ende në kujtesë mënyrën se si përfundoi ajo lëvizje.