Protestat e brezit Z kanë përfshirë edhe Gjermaninë, ku dhjetëra mijëra të rinj dolën në rrugë në dhjetëra qytete të vendit, duke kërkuar më shumë investime në arsim, uljen e kostos së jetesës dhe kundërshtuar rikthimin e shërbimit të detyrueshëm ushtarak.
Tubimet u zhvilluan të shtunën, më 31 tetor, në 34 qytete, mes tyre Berlin, Frankfurt, Hamburg, Këln dhe Mynih. Ato u organizuan nga lëvizja rinore “GenZ regelt!”, ndërsa kërkesat e protestuesve lidhen me atë që ata e konsiderojnë si neglizhencë të politikës ndaj problemeve dhe shqetësimeve të brezit të ri.
Sipas DW, demonstratat do të përqendroheshin te gjendja e shkollave, shkurtimet buxhetore, padrejtësia sociale, rritja e kostos së jetesës dhe ndryshimet klimatike.
Megjithatë, ajo që nisi si një valë protestash kryesisht paqësore, u përshkallëzua në disa qytete gjatë orëve të mbrëmjes.
Sipas raportimeve, në Frankfurt situata doli jashtë kontrollit, ku persona të maskuar grabitën të paktën dy dyqane, ndërsa disa biznese të tjera pësuan dëmtime. Policia raportoi gjithashtu hedhjen e bombave molotov në drejtim të shërbimeve të emergjencës dhe thyerjen e vitrinave të dyqaneve.
Përballë përshkallëzimit të situatës, autoritetet përdorën autobotë me ujë dhe gaz lotsjellës për të shpërndarë grupet e dhunshme. Në Hamburg u dogjën barrikada, ndërsa në Këln policia përdori gjithashtu autobotë me ujë për të ndërhyrë ndaj protestuesve.
Gjatë përplasjeve u plagosën disa efektivë policie dhe u kryen një numër arrestimesh. Në Frankfurt, mes bizneseve të sulmuara ishte edhe një dyqan armësh, nga ku policia sekuestroi dy armë pas arrestimit të një të dyshuari.
Pavarësisht incidenteve, organizatorët e lëvizjes “GenZ regelt!” janë distancuar nga dhuna, duke deklaruar se ekstremizmi, racizmi dhe sulmet ndaj personave apo pronës nuk kanë vend në protestën e tyre.
Sipas raportimeve, autoritetet raportuan rreth 18 mijë pjesëmarrës në Frankfurt, Mynih dhe Berlin, ndërsa organizatorët pretendonin se në protestat në të gjithë vendin morën pjesë rreth 120 mijë persona. Kjo shifër ishte më e ulët se pritshmëritë fillestare të organizatorëve, të cilët kishin parashikuar rreth 180 mijë pjesëmarrës.
Një nga çështjet kryesore që ka nxitur pakënaqësinë e të rinjve është edhe modeli i ri i shërbimit ushtarak në Gjermani. Protestuesit kundërshtojnë rritjen e shpenzimeve ushtarake dhe druhen se modeli i ri mund të hapë rrugën për rikthimin e shërbimit të detyrueshëm ushtarak.
Lëvizja në Gjermani vjen në një kohë kur protesta të ngjashme të brezit Z janë zhvilluar edhe në vende të tjera europiane, përfshirë Francën dhe Italinë, duke vënë në qendër të debatit pakënaqësitë e të rinjve ndaj politikave qeveritare dhe mungesës së perspektivës për të ardhmen.
