Zonja e Parë e Nju Jorkut, Rama Duwaji, ka udhëtuar sërish jashtë vendit, këtë herë drejt Anglisë, ku ka bashkëpunuar me yllin ndërkombëtar të muzikës pop, Dua Lipa, për një instalacion artistik në kuadër të Festivalit të Letërsisë në Londër 2026.
Duwaji, një artiste siriano-amerikane, e cila ka tërhequr vëmendjen e mediave më shumë për udhëtimet jashtë vendit sesa për praninë në krah të bashkëshortit të saj, ka realizuar animacionin për fushatën publike artistike dhe atë të reklamave në tabela të Dua Lipës, me titull “Read the World Differently” (Lexoje botën ndryshe). Fushata përqendrohet te klubi i librit i Lipës, Service95 Book Club, një projekt ndërkombëtar që promovon leximin, shkruan NY Post.
Dua Lipa, e cila është kuratore e festivalit që zhvillohet nga 20 tetori deri më 1 nëntor, ka kontribuar me tekstet për këtë bashkëpunim, raportoi FirstPost.com.
Bashkëshortja e kryebashkiakut të Nju Jorkut, Zohran Mamdani, u kritikua në korrik pasi zgjodhi të mos merrte pjesë në festimet për 250-vjetorin e Amerikës, duke udhëtuar drejt një kampi “mirëqenieje shpirtërore” islamik në ishullin turistik spanjoll të Majorkës, përpara kremtimeve patriotike.
Udhëtimet e vetme të zonjës së parë, e cila është rritur në Dallas dhe ka studiuar në Dubai, që prej betimit të Mamdanit më 1 janar, përfshijnë edhe një vizitë në Korsikë të Francës në korrik. Atje ajo ishte organizatore dhe artiste në rezidencë në një kamp të organizuar nga The Women Sanctuary, i cili ishte shitur plotësisht dhe i kushtohej “trashëgimisë së Marisë, gruas më të nderuar në Kuran”.
Një muaj më vonë, ajo rifilloi rolin e saj si “artiste në rezidencë” pranë The Women Sanctuary, kur kjo organizatë organizoi në Porto të Portugalisë kampin “Udhëtim përmes kaligrafisë islame”.
The Women Sanctuary ka bërë thirrje për shkatërrimin e Izraelit dhe që “Palestina” të pastrohet nga “shtypësit” e saj, në një seri postimesh me gjuhë urrejtjeje në rrjetet sociale.
“Shteti kolonial i aparteidit, Izraeli, ka kryer një gjenocid kundër popullit palestinez”, thuhej në një postim në Instagram të tetorit 2025. “T’i jepet fund shtetit kolonial të aparteidit, Izraelit. Liri Palestinës.”
Duwaji ka një histori të gjatë deklaratash kundër Izraelit dhe SHBA-së.
Në llogarinë e saj tashmë joaktive në Tumblr, në vitin 2015, ajo shprehu vlerësim për Leila Khaled, e cila ka rrëmbyer avionë palestinezë, si dhe për anëtarë të Frontit Popullor për Çlirimin e Palestinës. Në të njëjtën kohë, ajo ripublikoi një tekst polemik ku akuzoheshin ushtarakët amerikanë se “masakrojnë pa mëshirë civilë të vendeve të Botës së Tretë” për të ruajtur “hegjemoninë amerikane”.
