Ambasada amerikane në Moskë njoftoi sot se ka ” informacion në lidhje me një kërcënim të besueshëm ” për një sulm ndaj kryeqytetit rus , ndërsa shërbimet e inteligjencës ruse raportuan më pas se janë informuar dhe po ndërmarrin “veprimet e nevojshme”.
Ambasada amerikane “është në dijeni të një kërcënimi të besueshëm në lidhje me një ngjarje që do të shkaktojë viktima të shumta sot, më 31 tetor, në Muzeun dhe Parkun Natyror-Rezervë Tsaritsyno në Moskë”, njoftoi ajo në faqen e saj të internetit.
“Qeveria e Shteteve të Bashkuara po koordinon reagimin e saj me autoritetet përkatëse ruse”, tha ambasada, duke u bërë thirrje qytetarëve të shmangin vendin kulturor , një pallat të epokës perandorake të vendosur brenda një parku të madh në pjesën jugore të Moskës .
“Kemi marrë informacion nga pala amerikane në lidhje me përgatitjen e një sulmi ndaj Moskës. Operacionet e nevojshme janë duke u zhvilluar”, tha Shërbimi Federal i Sigurisë Ruse ( FSB ) për agjencinë e lajmeve TASS.
Sipas kanalit rus Baza në Telegram, i cili besohet se ka lidhje të ngushta me policinë, parku u mbyll sot, më 31 tetor në mesditë, por “lejohet vetëm dalja prej tij” dhe forcat e zbatimit të ligjit janë në vendngjarje.
Rusia ka qenë shënjestër e shumë sulmeve gjatë tridhjetë viteve të fundit, veçanërisht në Moskë dhe Kaukazin rus.
Në vitin 2024, SHBA-të e kishin paralajmëruar Moskën për një kërcënim të afërt terrorist, disa ditë para sulmit të 22 marsit në qendrën e koncerteve Crocus City Hall, i cili vrau 145 persona dhe la qindra të plagosur.
Në atë kohë, sipas Moscowtimes, kreu i shërbimeve të inteligjencës ruse, Sergei Naryshkin, e kishte përshkruar informacionin e transmetuar nga amerikanët si “tepër të përgjithshëm”.
“Shërbimi Federal i Sigurisë (FSB) mori informacione të caktuara nga shërbimet amerikane të inteligjencës, sipas të cilave një ngjarje e tillë, për fat të keq, ishte e mundur. Megjithatë, siç kishin theksuar edhe kolegët tanë rusë, informacioni ishte shumë i përgjithshëm dhe nuk na lejoi të identifikonim plotësisht autorët e këtij krimi të tmerrshëm”, kishte deklaruar ai.