Mbi 5 mijë persona kanë humbur jetën nga epidemia e Ebolës në Republikën Demokratike të Kongos, duke e kthyer këtë shpërthim në më vdekjeprurësin në historinë e vendit.
Sipas të dhënave të publikuara nga autoritetet qeveritare, deri më tani janë konfirmuar mbi 10 300 raste infektimi, ndërsa virusi është përhapur në tetë nga 26 provincat e vendit. Epidemia nisi në muajin maj dhe u bë shpërthimi më i rëndë në historinë e Kongos që në muajin gusht, ndërsa shkalla e vdekshmërisë ka arritur në 48.6 për qind.
Vatra kryesore e përhapjes mbetet provinca Ituri, në verilindje të vendit, një zonë e përfshirë nga konfliktet e armatosura, ku pasiguria dhe vështirësitë në lëvizje po pengojnë përpjekjet për të frenuar epideminë. Përveç Kongos, raste janë konfirmuar edhe në Kenia, Nigeri dhe Ugandë, duke rritur shqetësimin për përhapjen e mëtejshme të virusit në rajon.
Organizata Botërore e Shëndetësisë ka paralajmëruar se nevojitet intensifikimi i masave për kontrollin e epidemisë, zgjerimi i aksesit në zonat e prekura dhe rritja e ndërgjegjësimit të komuniteteve për rreziqet e infektimit. Aktualisht po kryhen testime dhe trajtime për personat e prekur, ndërsa janë duke u zhvilluar edhe prova klinike për vaksina. Shpërthimi aktual shkaktohet nga varianti Bundibugyo i virusit Ebola, për të cilin deri më tani nuk ekziston një vaksinë apo trajtim specifik i miratuar.
Sipas Kombeve të Bashkuara, kjo është epidemia e 17-të e Ebolës në historinë e Kongos dhe e dyta më e madhe e regjistruar ndonjëherë në botë. Shpërthimi i mëparshëm më vdekjeprurës në Kongo, gjatë viteve 2018–2020, shkaktoi 2 299 viktima, ndërsa epidemia më e rëndë në nivel global ishte ajo e Afrikës Perëndimore, në vitet 2014–2016, me mbi 11 325 të vdekur.
Ebola është një sëmundje e rëndë virale, simptomat e së cilës shfaqen papritur dhe përfshijnë temperaturë, të vjella dhe diarre, ndërsa në raste të rënda mund të shkaktojë dëmtime të organeve dhe gjakderdhje të brendshme ose të jashtme. Virusi transmetohet përmes kontaktit të drejtpërdrejtë me lëngjet trupore të personave të infektuar, si gjaku dhe të vjellat. Përpjekjet për të frenuar përhapjen janë vështirësuar edhe nga sulmet ndaj disa punonjësve shëndetësorë dhe një politikani që po angazhoheshin në reagimin ndaj epidemisë.