Një javë pas fitores së opozitës në zgjedhjet parlamentare në Serbi është arrestuar Marko Kriçak, drejtuesi i Policisë Kriminale Serbe, me urdhër të Prokurorisë. Ai dhe zëvendësi i tij, Bosko Sekuloviç, akuzohen për shpërdorim detyre, raportojnë mediat serbe duke iu referuar agjencisë shtetërore Tanjug. Arrestimi i një prej zyrtarëve të lartë të policisë, i konsideruar si një nga njerëzit e afërt të presidentit Aleksandar Vuçiç, është vënë re nga mediat, sipas “Blue News”.
Në zgjedhjet e së dielës së kaluar, lista e opozitës e mbështetur nga studentët fitoi shumicën e vendeve në parlament, duke lënë në opozitë koalicionin e udhëhequr prej vitesh nga Vuçiç. Transferimi i pushtetit nuk ka ndodhur ende, por zhvillimet e fundit po sinjalizojnë tronditje në strukturat që kanë mbështetur pushtetin e deritanishëm.
Sipas Tanjug, Prokuroria e akuzon Kriçakun për pengim dhe manipulim të hetimeve në një çështje vrasjeje me përfshirje të mafias. Ai dyshohet se ka manipuluar prova me qëllim që Prokuroria të tërhiqte akuzat për ndihmë në kryerjen e vrasjes. Përveç këtyre dyshimeve, Prokuroria e ngarkon edhe për keqtrajtim dhe intimidim të protestuesve paqësorë.
Karriera e Kriçakut, sipas tekstit, filloi si shitës makinash, përpara se të rekrutohej në Agjencinë e Inteligjencës së Brendshme të Serbisë (BIA), dhe konsiderohej mbështetës besnik i Partisë Progresive Serbe (SNS) të presidentit. Në korrik 2023 ai mori drejtimin e Njësisë së Mbrojtjes Personale të Policisë Serbe (JZO), ndërsa në fund të vitit 2025 u emërua në krye të Policisë Kriminale.
Një episod i rëndë i përmendur në akuzë lidhet me gushtin e vitit 2025, kur efektivë të JZO dyshohet se tërhoqën me forcë një grup studentësh drejt bodrumeve të një ndërtese qeveritare në Beograd. Kriçak, që në atë kohë drejtonte njësinë, dyshohet se ka udhëhequr personalisht operacionin; akuzohet se ka goditur një studente dhe e ka kërcënuar me përdhunim.
Arrestimi i tij konsiderohet një zhvillim i rëndësishëm në klimën e re politike në Serbi, ku fitorja e opozitës studentore ka vënë në pikëpyetje vazhdimësinë e ndikimit të strukturave të pushtetit të deritanishëm.