Një aksident me pasojë vdekjen e një këmbësoreje është regjistruar pasditen e sotme në Shkodër.
Sipas informacionit paraprak të Policisë, rreth orës 15:40, në vendin e quajtur “Ura e Bahçallëkut”, një 27-vjeçare, e identifikuar me inicialet B. P., dyshohet se ka humbur kontrollin mbi drejtimin e automjetit që drejtonte.
Si pasojë, makina ka dalë nga rruga dhe është përplasur me shkallët metalike të një ndërtese, duke goditur edhe këmbësoren 67-vjeçare, E. B., e cila në atë moment po ecte në trotuar.
Për shkak të përplasjes, 67-vjeçarja ka humbur jetën.
Grupi hetimor ndodhet në vendngjarje dhe po vijon punën për të sqaruar rrethanat dhe përcaktuar shkakun e aksidentit.